У турніры стартавалі 24 каманды з 12 краін, паядынкі асноўнага этапу праходзілі з 28 жніўня па 15 кастрычніка. Кожны клуб згуляў па адным матчы з шасцю рознымі сапернікамі (па тры сустрэчы дома і ў гасцях). Па выніках рэгулярнага сезона ў плэй-оф трапілі 16 найлепшых каманд. Першым у агульнай табліцы фінішаваў фінскі «Ільвес», які набраў максімальна магчымыя 18 ачкоў. Дзеючы ўладальнік трафея «Цюрых» спыніўся за крок ад вылету, заняўшы 15-е месца з 7 баламі.

Пераадолець бар’ер асноўнага этапу не змаглі чэмпіён Германіі «Айсберэн» і віцэ-чэмпіён Швейцарыі «Лазана». Таксама барацьбу за тытул завяршылі чэшскі «Маўнтфілд», аўстрыйскі «Клагенфурт», італьянскі «Бальцана», дацкі «Одэнсе», брытанскі «Белфаст» і польскі «Тыхы». Поўны склад пар адной восьмай фіналу турніру выглядае наступным чынам:

1. «Ільвес» (1-ы пасеў, Фінляндыя) — «Брэмерхафен» (16, Германія);
2. «КалПа» (2, Фінляндыя) — «Цюрых» (15, Швейцарыя);
3. «Фрэлунда» (3, Швецыя) — «Грэнобль» (14, Францыя),
4. «Спарта» (4, Чэхія) — «Цуг» (13, Швейцарыя);
5. «Луко» (5, Фінляндыя) — «Стархамар» (12, Нарвегія);
6. «Інгальштат» (6, Германія) — «Зальцбург» (11, Аўстрыя);
7. «Берн» (7, Швейцарыя) — «Брунес» (10, Швецыя);
8. «Камета» (8, Чэхія) — «Лулеа» (9, Швецыя).

Стартавыя матчы першага раўнда плэй-оф хакейнай лігі чэмпіёнаў пройдуць 11-12 лістапада, сустрэчы ў адказ адбудуцца 18-19 лістапада. Фінал сезона запланаваны на 3 сакавіка 2026 года. У папярэднія гады званне наймацнейшага клуба Еўропы заваёўвалі шведскія «Фрэлунда» (2016, 2017, 2019, 2020), «Лулеа» (2015) і «Рэгле» (2022), фінскія ЮП (2018) і «Тапара» (2023), а таксама швейцарскія «Жэнева-Сервет» (2024) і «Цюрых» (2025).