Упраўленнем Дэпартамента фінансавых расследаванняў Камітэта дзяржкантролю па Мінскай вобласці і Мінску выяўлена і спынена незаконная дзейнасць кампаніі, якая аказвае паслугі па праектаванні і дызайне аб’ектаў нерухомасці, размешчаных як на тэрыторыі Беларусі, так і замежных дзяржаў. На працягу 2022—2025 гадоў фірма не ў поўным аб’ёме адлюстроўвала ва ўліку грошы, атрыманыя ад аказання паслуг. Усяго ад падаткаабкладання ўтоена больш за 15 млн рублёў. Гэтыя сродкі траціліся ўладальнікамі арт-студыі на асабістыя мэты, у тым ліку набыццё дарагой нерухомасці ў Беларусі і за мяжой і люксавых аўтамабіляў.

Акрамя таго, частка схаванай выручкі выкарыстоўвалася для выплаты зарплаты ў канвертах. Устаноўлены факты выплаты шэрай зарплаты больш за 50 работнікам кампаніі. Агульны памер выплачанага заробку ў канвертах перавысіў 12 млн рублёў.

Папярэдне вызначаная сума шкоды, нанесенай дзяржаве, складае больш за 5 млн рублёў. Па фактах ухілення ад выплаты падаткаў і невыканання абавязкаў падатковага агента па пералічэнні падаткаў распачатыя крымінальныя справы. Сузаснавальнік кампаніі супрацоўнічае са следствам і дае прызнальныя паказанні.

«Органамі фінансавых расследаванняў працягваюцца праверачныя мерапрыемствы ў дачыненні да арганізацый, якія працуюць у сферы праектавання і распрацоўкі дызайну для камерцыйнай і жылой нерухомасці. Пры гэтым суб’екты гаспадарання маюць магчымасць самастойна звярнуцца ў падатковыя органы або органы фінансавых расследаванняў і добраахвотна заплаціць нявыплачаныя падаткі», — падкрэслілі ў КДК.