На балансе «Мінскзялёнбуда» знаходзяцца чатыры паркі з атракцыёнамі. У трох з іх апошнім днём работы каруселей у гэтым сезоне стане нядзеля, 28 верасня.

«Так, у сувязі са зніжэннем колькасці наведвальнікаў, а таксама з надыходам неспрыяльных умоў надвор’я атракцыёны спыняць работу ў парку Чалюскінцаў, імя Уга Чавеса і 500-годдзя горада Мінска», — падкрэсліў намеснік генеральнага дырэктара — галоўны інжынер ВКУП «Мінскзялёнбуд» Руслан Касевіч.

У Цэнтральным дзіцячым парку імя М.Горкага каруселі будуць працаваць і ў кастрычніку, аднак не кожны дзень. «Рабочымі днямі будуць пятніца, субота, нядзеля з 11.00 да 20.00. Гэты рэжым работы можа быць скарэкціраваны ў залежнасці ад умоў надвор’я», — адзначыў Руслан Касевіч.

Да завяршэння набліжаецца ў сталіцы і сезон фантанаў, якія будуць радаваць жыхароў і гасцей сталіцы да 30 верасня. З 1 кастрычніка УП «Мінскзялёнбуд» пачне работы па іх кансервацыі на асенне-зімовы перыяд.

«Аднак хачу адзначыць, што нашы паркі чакаюць наведвальнікаў у любы сезон. Гараджане ў іх могуць не толькі любавацца восенню, але і карыстацца спартыўнымі аб’ектамі, трэнажорнымі пляцоўкамі, абсталяваннем дзіцячых гульнявых комплексаў. Таксама ў нашых парках па-ранейшаму будуць праходзіць мерапрыемствы, якія праводзяцца адміністрацыямі раёнаў сталіцы», — расказаў Руслан Касевіч.