Напярэдадні Дня ведаў супрацоўнікі Першамайскага РУУС сталіцы наведалі выхаванцаў Сацыяльна-педагагічнага цэнтра з прытулкам Першамайскага раёна г. Мінска. Па традыцыі, якая склалася ў мінскай міліцыі, сродкі, атрыманыя ў якасці матэрыяльнага кампенсавання маральнай шкоды, адпраўляюцца на дабрачыннасць. 

Інспектар дарожна-патрульнай службы аддзела дзяржаўтаінспекцыі Уладзімір Кажамяка і камандзір групы роты патрульна-паставой службы міліцыі Юрый Сіняк сталі пацярпелымі па крымінальных справах. Грашовую кампенсацыю маральнай шкоды яны пералічылі на рахунак сацыяльна-педагагічнага цэнтра з прытулкам. Такі добры жэст не толькі дапамагае тым, хто асабліва мае патрэбу ў падтрымцы, але і служыць прыкладам клопату і адказнасці.

Для хлопчыкаў і дзяўчынак праваахоўнікі таксама падрыхтавалі падарункі — канцылярскія прылады і прысмакі. Міліцыянеры згулялі з хлопцамі ў футбол і далі магчымасць адчуць сябе кіроўцам аўтамабіля аператыўнага прызначэння.

«Вельмі важна, каб хлопцы і дзяўчаты, якія асабліва маюць патрэбу ў дапамозе, ведалі, што яны не адны. Чужых дзяцей не бывае. Міліцыянеры заўсёды побач і гатовы прыйсці на дапамогу», — адзначыў часовы выконваючы абавязкі па пасадзе намесніка начальніка Першамайскага РУУС г. Мінска па ідэалагічнай рабоце і кадравым забеспячэнні Раман Пракаповіч.

Вераніка КАНЮТА

Фота прэс-службы Першамайскага РУУС г. Мінска