Штогод да ўрачоў-стаматолагаў ажыццяўляецца каля 14-15 мільёнаў візітаў — амаль 1,5 наведвання на аднаго жыхара краіны. Асноўны аб’ём (больш за 12 мільёнаў наведванняў) забяспечвае дзяржаўны сектар, гарантуючы даступнасць, якасць і прафілактыку.
Як адзначае намеснік галоўнага ўрача па арганізацыйна-метадычнай рабоце Рэспубліканскага клінічнага стаматалагічнага цэнтра — Універсітэцкай клінікі, намеснік галоўнага пазаштатнага стаматолага Міністэрства аховы здароўя Уладзімір БЛІЗНЮК, для прыватнага сектара характэрна нераўнамернае развіццё з канцэнтрацыяй у сталіцы і абласных гарадах. Пры гэтым у 49 раёнах няма ніводнага платнага стаматолага.
— Гэта яшчэ адзін доказ таго, што дзяржава нясе на сваіх плячах большую частку клопату аб здароўі грамадзян, — падкрэсліў Уладзімір Блізнюк.
У краіне больш за 10 тысяч спецыялістаў стаматалагічнага профілю, з іх больш чым 8 тысяч працуе ў дзяржаўным сектары. Падрыхтоўку забяспечваюць дзве вядучыя медыцынскія ВНУ. Гэта Беларускі дзяржаўны медыцынскі ўніверсітэт і Віцебскі дзяржаўны ордэна Дружбы народаў медыцынскі ўніверсітэт. Зубных фельчараў рыхтуюць чатыры медыцынскія каледжы — у Мінску, Слуцку, Оршы і Гомелі.
Сучасныя тэхналогіі сёння шырока ўкараняюцца ў дзяржаўным сектары. Тут даступныя 3D-дыягностыка, лічбавыя CAD/CAM тэхналогіі (сістэмы аўтаматызаванага праектавання і вытворчасці, якія дазваляюць ствараць каронкі, вініры і пратэзы з максімальнай дакладнасцю, хуткасцю і эстэтыкай).
— Выкарыстоўваюцца ўсе тыя ж матэрыялы, праўда, іх асартымент крыху шырэйшы на платным прыёме. Дзяржаўныя кабінеты мы імкнёмся абсталяваць перадавым абсталяваннем і матэрыяламі, — адзначыў Уладзімір Блізнюк.
Каб найбольш кампетэнтна аказваць дапамогу, аб’ядналі пасады дарослага і дзіцячага стаматолага.
Праводзяцца самыя розныя мерапрыемствы па прафілактыцы, бо ніводнае захворванне так лёгка не ўдаецца папярэдзіць, як стаматалагічнае. Паводле навуковых даследаванняў, больш за 20 % карыесу можна пазбегнуць, калі прытрымлівацца правільнай штодзённай гігіены.
Як дадала начальнік клінічнага аддзела лячэбна-хірургічнай дапамогі Рэспубліканскага клінічнага стаматалагічнага цэнтра — Універсітэцкай клінікі, галоўны пазаштатны дзіцячы стаматолаг Міністэрства аховы здароўя Наталля ШАКАВЕЦ, сёння прынята рашэнне аднавіць работу той праграмы прафілактыкі, якая працавала ў нашай краіне з 1986 года і прыносіла пэўныя поспехі. Распрацаваны комплекс мер, які будзе рэкамендаваны да рэалізацыі ў рэгіёнах.
— Калі казаць з пункту гледжання доказнай медыцыны, то найбольш эфектыўным і даступным сродкам прафілактыкі карыесу ў дзіцячым узросце з’яўляецца чыстка зубоў фторутрымальнай пастай, — адзначыла Наталля Шакавец.
Адметна, што догляд малочных зубоў уплывае на стан карэнных.
— Важна ўсё, што закладзена ў дзяцінстве. Неабходна прывучаць да чысткі зубоў, да рацыянальнай гігіены з самага ранняга ўзросту. Калі чалавек будзе правільна даглядаць за зубамі, гэта ў большасці выпадкаў прадухіліць развіццё карыесу. Хачу звярнуць увагу бацькоў. Некаторыя лічаць, што часовыя зубы выпадуць і іх не трэба лячыць, але гэта глыбокая памылка. Карыёзныя мікраарганізмы, якія засяляюць поласць рота, будуць потым заставацца і ў пастаянных зубах, адпаведна, будзе вялікая схільнасць да развіцця карыесу, — адзначыла спецыяліст.
Сучасныя матэрыялы і інавацыйныя тэхналогіі шырока прымяняюцца ў дзіцячай стаматалогіі. Цяпер у асноўным выкарыстоўваюцца мінімальна інвазіўныя метады, што дазваляе захаваць як мага больш здаровых тканак, у адрозненні ад падыходаў, якія прымяняліся ў пачатку і сярэдзіне мінулага стагоддзя.
Што датычыцца сківічна-тварнай хірургіі, то, паводле слоў дацэнта кафедры сківічна-тварнай хірургіі і пластычнай хірургіі твару з курсам павышэння кваліфікацыі Беларускага дзяржаўнага медыцынскага ўніверсітэта, галоўнага пазаштатнага сківічна-тварнага хірурга Міністэрства аховы здароўя, кандыдата медыцынскіх навук Фёдара ГАРБАЧОВА, беларускія спецыялісты выконваюць усе магчымыя планавыя і неадкладныя хірургічныя ўмяшанні пры траўматычных пашкоджаннях, інфекцыйна-запаленчых ускладненнях, прыроджаных паталогіях. Ёсць магчымасць выконваць мікрасасудзістыя рэканструкцыі. З 2014 года робяцца высокатэхналагічныя аператыўныя ўмяшанні пры дапамозе 3D-планавання і вырабу індывідуальных, як тытанавых, так і палімерных імплантатаў, што значна палепшыла якасць лячэння пацыентаў са складанай паталогіяй сківічна-тварнай вобласці.
