Рэспубліканская акцыя для дзесяцікласнікаў «Запусці сэрца» па навучанні прынцыпам даўрачэбнай дапамогі стартавала ў Беларусі, паведаміў намеснік галоўнага ўрача па хірургіі Рэспубліканскага клінічнага медыцынскага цэнтра Кіраўніцтва справамі Прэзідэнта Рэспублікі Беларусь Юрый Слабадзін, паведамляе БелТА.
«Сёння ўжо другі раз стартуе гэтая акцыя. Упершыню мы яе правялі ў 2024 годзе. Наш цэнтр, Рэспубліканскі клінічны медыцынскі цэнтр Кіраўніцтва справамі Прэзідэнта, быў ініцыятарам, — сказаў Юрый Слабадзін. — Нам вельмі прыемна, што традыцыйна акцыя стартуе на базе нашага цэнтра. У нас дастаткова сур’ёзны сімуляцыйны цэнтр, дзе мы займаемся паслядыпломнай адукацыяй».
Такія ж заняткі для школьнікаў сёння пачаліся ва ўсіх рэгіёнах. Акрамя Рэспубліканскага клінічнага медыцынскага цэнтра, задзейнічаны ўсе сімуляцыйныя цэнтры на базе 16 медыцынскіх каледжаў, чатырох медыцынскіх універсітэтаў, рэспубліканскага сімуляцыйнага цэнтра, які знаходзіцца ў Мінску. Як і ў 2024 годзе, далучылася Астравецкая цэнтральная раённая бальніца, у якой ёсць свой сімуляцыйны цэнтр. Бальніца ўзяла на сябе тры бліжэйшыя раёны.
Школьнікаў будуць навучаць на працягу двух месяцаў. Праект завершыцца маштабным флэшмобам.
