Пачынаецца рэалізацыя аднаго з самых чаканых інфраструктурных праектаў — скорасных пасажырскіх чыгуначных зносін па маршруце Мінск — Гарадзішча — індустрыяльны парк «Вялікі камень» — Нацыянальны аэрапорт Мінск, расказалі ў адміністрацыі парка.
Падрыхтоўчыя работы плануецца пачаць у 2025 годзе.
Згодна з праектам, чыгунка пройдзе па існуючым маршруце ад станцыі Мінск-Пасажырскі праз Калодзішчы да станцыі Гарадзішча, пасля якой будзе пабудавана каля 18 кіламетраў новых чыгуначных пуцей у напрамку аэрапорта.
Агульная працягласць маршруту складзе 41,8 кіламетра, а час у дарозе — менш за 30 хвілін.
Інфраструктура на гэтым участку будзе стварацца практычна з нуля, таму рэалізацыя праекта разлічана на некалькі гадоў. Тэрміны рэалізацыі — да 2028-2029 гадоў, калі пойдуць першыя саставы.
— Праект скорасных зносін створыць сучасную транспартную сувязь паміж сталіцай, індустрыяльным паркам «Вялікі камень» і Нацыянальным аэрапортам Мінск, спрыяючы далейшаму развіццю парка як ключавога лагістычнага і інвестыцыйнага цэнтра рэгіёна, — падкрэслілі ў адміністрацыі парка.
