Ігар Сергяенка павіншаваў новага пасла з пачаткам дыпламатычнай місіі ў нашай краіне. «Вы дасведчаны дыпламат, маеце важкую падрыхтоўку, сур’ёзны багаж — у вас за плячыма работа ў цэнтральным апараце, у некалькіх краінах, на практыцы. Упэўнены, што ваша дзейнасць будзе садзейнічаць далейшаму развіццю беларуска-ўзбекскіх адносін, у аснове якіх, вядома ж, падмурак дружбы, узаемнага даверу і павагі», — сказаў ён.

«Сёння бачым, наколькі дынамічна развіваюцца адносіны паміж нашымі краінамі. І дынаміку двухбаковым адносінам надаюць нашы лідары. Літаральна месяц таму адбыўся гістарычны, як мы лічым, дзяржаўны візіт Прэзідэнта Узбекістана ў Беларусь. Была падпісаная Дэкларацыя аб устанаўленні стратэгічнага партнёрства, і гэта накладвае на нашы краіны, і ў тым ліку на парламент, сур’ёзную адказнасць у выбудоўванні далейшых адносін», — адзначыў Ігар Сергяенка.

Старшыня Палаты прадстаўнікоў падкрэсліў, што ва ўмовах геапалітычнай напружанасці неабходна ўмацоўваць супрацоўніцтва на аснове прынцыпаў салідарнасці, аказання ўзаемнай падтрымкі ў шэрагу міжнародных арганізацый. «Літаральна ў пачатку верасня ваша краіна прыме XII Глабальную канферэнцыю маладых парламентарыяў Міжпарламенцкага саюза, што сведчыць пра высокі міжнародны аўтарытэт Узбекістана. Беларусь прыме ўдзел і накіруе туды нашых прадстаўнікоў», — дадаў ён.

Таксама ён акрэсліў, што ў аснове адносін дзвюх краін ляжаць і гандлёва-эканамічныя сувязі. «Мы ўжо практычна наблізілі тавараабарот да 1 млрд долараў ЗША. Да 2030 года стаіць задача павялічыць гэту лічбу ў два разы. Зразумела, што базісам эканамічных адносін з’яўляецца ў тым ліку і міжрэгіянальная сувязь. І гэтаму спрыяе і правядзенне форумаў», — сказаў Ігар Сергяенка.

Нурыдзін Мамажонаў адзначыў, што для яго работа ў Беларусі — гэта новы і своеасаблівы досвед дыпламатыі.

Старшыня Пастаяннай камісіі Палаты прадстаўнікоў па міжнародных справах Сяргей Рачкоў падкрэсліў, што ў апошнія гады пашыраюцца міжпарламенцкія сувязі. «У парламентах працуюць групы дружбы, мы абменьваемся візітамі, удзельнічаем у розных міжнародных мерапрыемствах адзін у аднаго, — сказаў ён. — Акрамя развіцця міжпарламенцкіх сувязяў, палітычнага дыялогу, вялікая ўвага ўдзяляецца гандлёва-эканамічнай тэматыцы. Складваецца вельмі добрае супрацоўніцтва ў гэтай сферы».

«Беларусь цікавяць перш за ўсё магчымасці паставак сваёй тэхнікі ва Узбекістан. Гэта горназдабыўная краіна, там карыстаецца папулярнасцю наша цяжкая грузавая тэхніка.

Але гэта і сельскагаспадарчая краіна, таму пунктаў судакранання ў Беларусі і Узбекістана вельмі шмат», — заявіў Сяргей Рачкоў.

Паводле яго слоў, краіны карыстаюцца гэтымі магчымасцямі, падтрымліваючы адна адну як ва ўнутрыкраінавым развіцці, так і на міжнародных пляцоўках. «І сёння наша першая сустрэча з новым паслом. Гэта заўсёды хвалюючы момант. Найперш, я думаю, для новага пасла. Але Беларусь і Узбекістан — дружалюбныя краіны, мы паважаем адно аднаго, цэнім, падтрымліваем», — падсумаваў дэпутат.