Праблема лішняй вагі ў дзяцей становіцца ўсё больш прыкметнай. Па даных Цэнтра па кантролі і прафілактыцы захворванняў ЗША (CDC), у 2024 годзе прыкладна кожнае пятае дзіця і падлетак у краіне пакутавала ад атлусцення.

Традыцыйна прафілактыка сканцэнтравана на правільным харчаванні і фізічнай актыўнасці. Аднак навукоўцы лічаць, што ёсць яшчэ адзін важны фактар — стрэс бацькоў.

Даследчыкі правялі 12-тыднёвае даследаванне з удзелам 114 бацькоў, у якіх былі дзеці ва ўзросце ад двух да пяці гадоў з залішняй вагой або атлусценнем. Удзельнікаў падзялілі на дзве групы.

Першая група праходзіла спецыяльную праграму кіравання стрэсам. Бацькоў вучылі тэхнікам усвядомленасці, самарэгуляцыі і адначасова давалі рэкамендацыі па харчаванні і фізічнай актыўнасці.

Другая група атрымлівала толькі парады па здаровым ладзе жыцця — без работы са стрэсам.

Праз тры месяцы навукоўцы заўважылі адрозненні. У бацькоў з першай групы знізіўся ўзровень стрэсу, палепшыліся навыкі зносін з дзецьмі, а самі дзеці радзей выбіралі нездаровую ежу і не набіралі лішнюю вагу.

У кантрольнай групе, дзе са стрэсам не працавалі, сітуацыя была іншай: дзеці значна дадалі ў вазе і ў шэсць разоў часцей траплялі ў катэгорыю рызыкі атлусцення.

Па словах кіраўніка даследавання, зніжэнне стрэсу ў бацькоў можа стаць трэцім важным элементам прафілактыкі дзіцячага атлусцення нароўні з правільным харчаваннем і фізічнай актыўнасцю.