«Цяпер вядзецца вялікая работа па падрыхтоўцы стрымінгавага канала, дзякуючы якому мы разлічваем у кругласутачным рэжыме праз Інтэрнэт-вяшчанне паказваць архіўную кінахроніку. Мы хочам у канцы гэтага года-пачатку наступнага запусціць гэты канал, які дазволіць больш паказваць нашу хроніку», — сказаў Андрэй Ганчар.

Зараз таксама вядзецца работа над праектам «Страчаная архітэктура Беларусі», прысвечаным багатай архітэктуры краіны, якая стваралася на працягу многіх стагоддзяў, але не захавалася да цяперашняга часу. Праект плануюць завяршыць у канцы года.

Андрэй Ганчар адзначыў, што пастаянна расце запыт аўдыторыі на візуальную інфармацыю, таму архіў працуе над тым, каб падобныя дакументы былі даступныя максімальнай колькасці гледачоў. «Для гэтага мы працуем з рознай аўдыторыяй, з рознымі спосабамі і фарматамі», — адзначыў ён.

«На Беларускім тэлебачанні штодня транслюецца архіўная кінахроніка, прысвечаная гісторыі нашай краіны. Гэта і праекты Белтэлерадыёкампаніі «У адкрытым доступе», «Без рэтушы», і работа з тэлеканалам АНТ у рамках праграмы «Наша раніца», шэраг іншых праектаў і дакументальных фільмаў. Таму наша аўдыторыя, нашы грамадзяне і не толькі могуць бачыць гісторыю нашай краіны», — дадаў ён.

Акрамя таго, ужо чатыры гады дзейнічае праект «Адкрыты кінаархіў. Гэты дзень мы набліжалі як маглі», дзякуючы якому ў агульны доступ выходзіць кінахроніка, пару гадоў таму нават не алічбаваная. Сёння яе можна ўбачыць у кінатэатрах, розных установах адукацыі, на YouTube-канале, дзе выходзіць і шэраг іншых праектаў. Вядзецца работа над тым, каб гэтай кінахронікай маглі карыстацца музеі і іншыя ўстановы.

«Мы актыўна працуем з партнёрамі, якія звяртаюцца да нас для прадастаўлення фотаматэрыялаў і кінаматэрыялаў, якія актыўна выкарыстоўваюцца ў кнігах з дапамогай QR-кодаў. Працягваецца выставачная дзейнасць на мерапрыемствах самага рознага фармату з органамі рэспубліканскага кіравання, архівамі, музеямі. Мы супрацоўнічаем з Нацыянальным гістарычным музеем па фарміраванні іх новай экспазіцыі і далі музею больш за дзясятак гадзін кінахронікі. Многія матэрыялы яшчэ нідзе не паказваліся і ў музеі будуць упершыню прадстаўлены ў шырокім фармаце», — растлумачыў Андрэй Ганчар.

Актуальнае і пытанне ўкаранення ў работу штучнага інтэлекту. Яго выкарыстанне дапаможа стварыць новы сэрвіс для карыстальнікаў па пошуку дакументаў не толькі па ключавых словах, але і па тых малюнках, якія знаходзяцца ў кінахроніцы і на фотаздымках. «Бачныя перспектывы выкарыстання ШІ пры вядзенні нашых сацыяльных сетак, стварэнні і мантажы відэаролікаў, каб максімальна павялічыць іх аб’ём і асвятляць самыя розныя тэмы», — падсумаваў дырэктар.