Пачаўся тэматычны тыдзень з урачыстага адкрыцця спартыўна-масавага мерапрыемства «Стартуюць усе» на стадыёне сярэдняй школы № 25. Дзеці дэманстравалі сілу, спрыт і вынослівасць у розных эстафетах. Сапраўдным сюрпрызам для вучняў стала сустрэча з чэмпіёнам свету па цяжкай атлетыцы Паўлам Кулікоўскім. Атлет пажадаў хлопцам і дзяўчатам не пакідаць спорт, а наадварот, з ім моцна пасябраваць, каб фізічная актыўнасць суправаджала маладых людзей усё жыццё.

— На працягу тыдня навучэнцаў усяго раёна чакаюць займальныя спартыўныя сустрэчы. 23 верасня ў 15:00 адбудзецца Дзень адкрытых дзвярэй у нашым фізкультурна-спартыўным цэнтры дзяцей і моладзі, дзе можна запісацца ў гурткі і секцыі, — расказалі ва ўпраўленні па адукацыі адміністрацыі Маскоўскага раёна. — Пройдуць раённыя спаборніцтвы па лёгкай атлетыцы сярод 5-х і 6-х класаў, паказальныя выступленні па паўэрліфтынгу, майстар-класы па ірландскіх танцах, футболе, баскетболе. Старшакласнікі раёна паспаборнічаюць у стрытболе, валейболе і міні-футболе.

Усяго ў спартыўна-масавых мерапрыемствах паўдзельнічаюць каля дзвюх тысяч навучэнцаў Маскоўскага раёна.