«2025-ы стаў годам, калі ўвесь патэнцыял штучнага інтэлекту раскрыўся ва ўсёй красе, і стала зразумела, што шляху назад няма. За тое, што яны паклалі пачатак эры думаючых машын, уразілі і занепакоілі чалавецтва, змянілі сучаснасць і перасягнулі ўсе чаканні, „архітэктары ШІ“ прызнаныя часопісам Time чалавекам года», — адзначаецца ў паведамленні.

На вокладцы снежаньскага нумара Time, аформленай у стылі вядомай фатаграфіі "Абед на небаскробе", намаляваны прадпрымальнікі Ілан Маск і Марк Цукерберг, гендырэктары AMD Ліза Су і прыналежнай Google ШІ-кампаніі DeepMind Дэміс Хасабіс, кіраўнік Nvidia Джэнсен Хуанг, OpenAI Сэм Альтман, Anthropic Дарыё Амадэй і заснавальніца ImageNet Фэй-Фэй Лі.

Амерыканскі грамадска-палітычны часопіс Time з 1927 года ў снежаньскім нумары аб’яўляе чалавека адыходзячага года і размяшчае яго фатаграфію на вокладцы. У 2024 годзе чалавекам года па версіі Time стаў прэзідэнт ЗША Дональд Трамп.