Абвінавачаны ў ноч на 28 чэрвеня гэтага года распіваў спіртныя напоі з калегам па працы. У стане ап’янення, свядома парушыўшы правілы бяспекі, ён сеў за руль легкавога аўтамабіля Mercedes і разам са сваім знаёмым накіраваўся з Мінска ў бок Масквы. Каля 5.00 на 20-м км трасы М2 Мінск — Нацыянальны аэрапорт Мінск паблізу в. Каралёў Стан кіроўца рухаўся з хуткасцю 182 км/г пры дазволенай не больш за 90 км/г. Пры гэтым, размаўляючы ў дарозе з пасажырам, адцягваўся ад кіравання машынай. З-за невыканання бяспечнай дыстанцыі да таксі, якое ехала наперадзе, абвінавачаны ўчыніў з ім сутыкненне.

У выніку ДТЗ пасажыры таксі — 43-гадовая жанчына, яе 75-гадовая маці і дзве дачкі ва ўзросце 7 і 13 гадоў — загінулі на месцы здарэння, а 40-гадоваму кіроўцу прычыненыя менш цяжкія цялесныя пашкоджанні.

Загінулыя з’яўляліся грамадзянамі Расійскай Федэрацыі і прыбылі ў Беларусь у турыстычных мэтах. У той момант яны накіроўваліся ў аэрапорт, каб вярнуцца дадому ў Бярэзнікі Пермскага краю — да вылету самалёта заставалася менш за дзве гадзіны. 

«З улікам прадстаўленых бокам дзяржаўнага абвінавачвання доказаў судом Мінскага раёна па справе пастаноўлены абвінаваўчы прысуд. Прымаючы пад увагу грамадскую небяспеку ўчыненага злачынства, а таксама з улікам звестак пра асобу абвінавачанага яму ў адпаведнасці з ч. 5 арт. 317 КК прызначана пакаранне ў выглядзе пазбаўлення волі на максімальны тэрмін, прадугледжаны санкцыяй гэтага артыкула, — 10 гадоў з адбываннем пакарання ў папраўчай калоніі ва ўмовах агульнага рэжыму і з пазбаўленнем права займацца дзейнасцю, звязанай з кіраваннем транспартнымі сродкамі, на тэрмін 8 гадоў», — адзначыла Таццяна Гракун.