«Нашы краіны і народы звязваюць добрыя, дружалюбныя адносіны, нягледзячы на адлегласць, розныя культуры, — адзначыла старшыня Савета Рэспублікі Наталля Качанава ў сваім прывітальным слове. — Але мы сапраўды дружныя шмат у чым дзякуючы той палітыцы, якую праводзяць прэзідэнты нашых краін, паміж якімі склаўся даверны дыялог, што дазволіла краінам выбудаваць стратэгічнае партнёрства. Каля 350 тыс. беларусаў наведалі Турцыю летась. Статыстыка ў адваротным кірунку некалькі іншая, але мы будзем працаваць над гэтым пытаннем. Для гэтага ёсць усё — перш за ўсё дагаворна-прававая база. Сёння больш за 40 дагавораў і пагадненняў паміж нашымі краінамі па ўсіх напрамках. Больш за тое, у ліпені мы будзем адзначаць 30-годдзе падпісання Дамовы аб дружбе і супрацоўніцтве паміж нашымі краінамі. Наш тавараабарот перавысіў планку ў мільярд долараў, але гэта не мяжа».

Па выніках сустрэчы старшыня Пастаяннай камісіі Савета Рэспублікі па міжнародных справах і нацыянальнай бяспецы Сяргей Алейнік расказаў журналістам, што бакі надалі прыярытэтную ўвагу пытанням гандлёва-эканамічнага супрацоўніцтва. «Турцыя ўваходзіць у дзясятку найбуйнейшых гандлёвых партнёраў нашай краіны. У нас вельмі добрая дынаміка росту тавараабароту. За першы квартал бягучага года тавараабарот вырас яшчэ на 15%, а ў частцы беларускага экспарту — на крыху больш за 7%. Падобныя сустрэчы з дзелавымі коламі Турцыі, саветам дзелавога супрацоўніцтва, які існуе ўжо на працягу многіх гадоў, дазваляюць нам знаходзіць новыя пункты росту для супрацоўніцтва паміж нашымі краінамі», — расказаў Сяргей Алейнік.

• Ён выказаў упэўненасць у тым, што прыезд турэцкай дэлегацыі дасць магчымасць выйсці на новыя дамоўленасці як у частцы гандлёва-эканамічнага супрацоўніцтва (перш за ўсё ў прамысловай кааперацыі, сельскай гаспадарцы, дрэваапрацоўцы, лёгкай прамысловасці і іншых сферах), а таксама знайсці новыя пункты судакранання ў плане інвестыцыйнага супрацоўніцтва, стварэння сумесных вытворчасцяў. «У нас у краіне сёння працуе 147 кампаній з турэцкім капіталам. На тэрыторыі Турцыі дзейнічае 117 кампаній з беларускім капіталам. Гэта і асобныя, і сумесныя прадпрыемствы. Мы сёння абмяркоўвалі перспектывы развіцця турызму, намецілі канкрэтныя крокі ў напрамку павелічэння турпатоку як у Беларусь, так і ў Турцыю. Мы гаварылі і аб развіцці міжрэгіянальных сувязей паміж нашымі краінамі. Савет Рэспублікі надае гэтаму прыярытэтную ўвагу. У нас падпісана сем пагадненняў аб пабрацімстве паміж рэгіёнамі Беларусі і Турцыі. У прапрацоўцы знаходзіцца яшчэ тры. З улікам таго, што ў Турцыі 81 правінцыя, вядома, патэнцыял міжрэгіянальнага супрацоўніцтва велізарны», — падкрэсліў старшыня Пастаяннай камісіі Савета Рэспублікі. 

Надзвычайны і Паўнамоцны пасол Турцыі ў Беларусі Гючлю Джэм Ышык указаў на тое, што Турэцкая дэлегацыя прыбыла ў Беларусь для наведвання Міжнароднай спецыялізаванай выставы «Белагра-2026». «Эканамічныя адносіны займаюць важную долю ў спектры пытанняў, па якіх супрацоўнічаюць нашы краіны. Хоць дэлегацыя турэцкіх дзелавых колаў прыбыла для таго, каб наведаць выставу „Белагра“, будуць таксама вывучацца пытанні існуючых і патэнцыйна цікавых для бакоў напрамкаў гандлёва-эканамічнага супрацоўніцтва. На гэтай сустрэчы мы падкрэслілі наш падыход, згодна з якім Турцыя разглядае Беларусь не ў якасці рынку для сваёй прадукцыі, а гаворка ішла пра тое, што мы гатовыя закупляць беларускія тавары, рады пастаўкам турэцкіх тавараў у Беларусь і гатовыя да сумеснай вытворчасці прадукцыі для пастаўкі на рынкі трэціх краін», — адзначыў Гючлю Джэм Ышык.