Па даных следства, 28-гадовая жыхарка Віцебска працавала спецыялістам па рабоце з кліентамі ў адной з кампаній мабільнай сувязі. З лютага па май 2026 года яна афармляла на абаненцкія нумары родных, блізкіх і сяброў (усяго 11 чалавек) дарагія тавары ў растэрміноўку без іх ведама. У спісе пакупак - смартфоны iPhone 17 Pro Max, iPhone 17, iPhone 16 Pro, iPhone 15, разумныя гадзінннікі Apple Watch, а таксама бесправадныя навушнікі Huawei і AirPods. 

Некаторыя з гаджэтаў жанчына пакінула сабе, а астатняе разам з мужам прадавала на гандлёвых інтэрнэт-пляцоўках. Частку выручаных грошаў траціла на аплату крэдытаў, арэнду кватэры і пагашэнне запазычанасці па растэрміноўках, а ўсе астатнія сродкі прайгравала ў анлайн-казіно. У маі жанчына ўсвядоміла, што не зможа пагашаць растэрміноўкі, бо сумы плацяжоў перавышалі яе заробак. Калі бацькам мужа сталі прыходзіць паведамленні аб неабходнасці пагашэння доўгу, яна вырашыла ва ўсім прызнацца. Маёмасная шкода, прычыненая арганізацыі, склала 56,8 тыс. рублёў. Яна пакрыта часткова.

Згодна з заключэннем судова-псіхіятрычнай экспертызы, у жанчыны маецца і мелася падчас здзяйснення злачынства псіхічнае расстройства (захворванне) у форме паталагічнай схільнасці да азартных гульняў. Яна магла ў поўнай меры ўсведамляць значэнне сваіх дзеянняў і кіраваць імі.

Дзеянні мужа і жонкі кваліфікаваныя па ч. 4 арт. 209 КК (махлярства, здзейсненае групай асоб у асабліва буйным памеры). Расследаванне крымінальнай справы завершана, матэрыялы перададзеныя пракурору для накіравання ў суд.