Афіцыйным перагаворам папярэднічала цырымонія сустрэчы з выкананнем гімнаў дзвюх краін і ўдзелам роты ганаровай варты.

Палац «Эль-Мурадзія» — рэзідэнцыя Прэзідэнта Алжыра, дзе прымаюць афіцыйныя замежныя дэлегацыі. Палац, а таксама аднайменная мясцовасць, у якой ён размешчаны, названы ў гонар Дзідуша Мурада — нацыянальнага героя, які загінуў у вайне з Францыяй за незалежнасць Алжыра. 

Па мясцовай традыцыі перагаворы кіраўнікоў дзяржаў у вузкім і пашыраным складах прайшлі ў закрытым фармаце без пратакольных заяў для СМІ. Заявы зроблены ўжо па выніках сустрэчы. 

Як паведамлялася раней, акцэнт у перагаворах Аляксандра Лукашэнкі і Абдэльмаджыда Тэбуна робіцца на паглыбленні гандлёва-эканамічнага супрацоўніцтва і рэалізацыі ўзаемавыгадных двухбаковых праектаў. У цэнтры ўвагі перспектывы паставак тэхнікі і кааперацыі, узаемадзеяння ў аграпрамысловым комплексе, медыцыне, адукацыі і гуманітарнай сферы ў цэлым. 

Кіраўнік беларускай дзяржавы прыбыў у Алжыр напярэдадні. Гэта ўжо чацвёртая краіна ў яго вялікім замежным турнэ. Каля трапа Прэзідэнта сустрэў старшыня Савета нацыі Алжырскай Народнай Дэмакратычнай Рэспублікі Насэры Азуз. 

Адразу па прыбыцці Аляксандр Лукашэнка правёў сустрэчы са спікерам Нацыянальнай народнай асамблеі Ібрагімам Бугалі і прэм’ер-міністрам Сіфі Грыебам. 

Прэзідэнт на гэтых сустрэчах выказаў упэўненасць, што Беларусь і Алжыр змогуць значна павялічыць тавараабарот. «Мы абавязковыя людзі і будзем няўхільна выконваць нашы дамоўленасці. Тармажэння з нашага боку не будзе», — сказаў ён. 

Па выніках 2024 года тавараабарот склаў крыху больш за $49 млн, з якіх практычна ўвесь аб’ём — гэта беларускі экспарт. 

Аляксандр Лукашэнка заявіў аб неабходнасці прыняцця і паўнавартаснай рэалізацыі Дарожнай карты развіцця супрацоўніцтва: «Я добра разумею, што такое Алжыр для Афрыкі. Мы супрацоўнічаем з многімі краінамі Афрыканскага кантынента. Таму што за Афрыкай будучыня. Мы абавязкова павінны выпрацаваць абсалютна працаздольны план нашых адносін, нашых дзеянняў». 

«Мы гатовыя даць вам тэхналогіі ў галіне машынабудавання, нафтахіміі, хіміі, сельскай гаспадаркі, IT-тэхналогіі. Мы гатовы з вамі супрацоўнічаць у сферы ваенна-прамысловага комплексу. Словам, закрытых тэм у нашых адносінах няма», — запэўніў Прэзідэнт. 

Напярэдадні візіту ў Алжыры адбыўся двухбаковы бізнес-форум, у якім прымалі ўдзел больш за сотню прадстаўнікоў міністэрстваў, прадпрыемстваў і арганізацый з абодвух бакоў. Праведзены шматлікія сустрэчы і перагаворы на розных узроўнях. 

Сімвалічна, што афіцыйны візіт Аляксандра Лукашэнкі ў Алжыр праходзіць у год 30-годдзя ўстанаўлення дыпламатычных адносін паміж дзвюма краінамі.

Беларусь і Алжыр дамовіліся аб умацаванні сяброўства і прынялі дарожную карту на наступныя два гады

Сумесная заява аб умацаванні адносін сяброўства і партнёрства паміж Беларуссю і Алжырам падпісана кіраўнікамі дзяржаў Аляксандрам Лукашэнкам і Абдэльмаджыдам Тэбунам па выніках афіцыйных перагавораў, паведамляе БелТА.

У прысутнасці лідараў краін падпісаны таксама шэраг дакументаў, галоўны з якіх — дарожная карта па развіцці супрацоўніцтва паміж Беларуссю і Алжырам на перыяд 2026–2027 гадоў.

«Грошы любяць цішыню. Таму мы не будзем у дарожнай карце прапісваць канкрэтныя кантракты. Мусіць, гэта было б няправільна. Але асноўныя кірункі і замацаваных (хто за якія кірункі адказвае) у дарожнай карце трэба вызначыць. З канкрэтнымі тэрмінамі выканання», — сказаў журналістам міністр антыманапольнага рэгулявання і гандлю, сустаршыня беларуска-алжырскай міжурадкамісіі Артур Карповіч.

Ён растлумачыў, што дарожная карта прымаецца на два гады, таму што ў свеце ўсё хутка мяняецца: «Напэўна, рабіць дарожную карту на 5 гадоў сэнсу вялікага няма. Дарожная карта павінна быць на найбліжэйшую перспектыву».

Міністр адзначыў, што алжырцы — людзі ўсходнія, і часам тыя ці іншыя пытанні вырашаюцца няпроста. «Але калі яны бачаць, што ты з адкрытай душой, адкрытым сэрцам, то тады і стаўленне да цябе адпаведнае. З любым міністрам у нас выбудоўваецца дыялог, прычым вельмі канкрэтны», — сказаў ён.

Ужо вызначана, што наступнае пасяджэнне міжурадкамісіі пройдзе ў Мінску ў першай палове лютага 2026 года.

Заключаны пагадненні аб ваенна-тэхнічным супрацоўніцтве, супрацоўніцтве ў галіне аховы здароўя жывёл, навуковых даследаванняў, тэхналагічнага развіцця і інавацый.

На ўзроўні профільных ведамстваў падпісаны мемарандумы аб узаемаразуменні ў сферы супрацоўніцтва ў прававой сферы, у галіне навуковых даследаванняў і развіцця галін прамысловасці, у галіне сельскай гаспадаркі, у сферы прадпрымальніцтва і інавацый, у галіне вышэйшай адукацыі.

Акрамя таго, заключаны мемарандум аб узаемаразуменні ў галіне акрэдытацыі паміж Беларускім дзяржаўным цэнтрам акрэдытацыі і ALGERAC.