Паводле ацэнак экспертаў СГА, да пачатку канфлікту рост аб’ёмаў сусветнага гандлю павінен быў суправаджацца ростам сусветнага ВУП на 2,8 % як у 2026 годзе, так і ў 2027 годзе. Але цяпер сітуацыя памянялася.

«Калі выказаць здагадку, што цэны як на нафту, так і на звадкаваны прыродны газ застануцца на высокім узроўні цягам усяго 2026 года, а ў 2027-м стабілізуюцца, рост сусветнага ВУП у 2026 годзе замарудзіцца да 2,5 % (што азначае зніжэнне прыкладна на 0,3 працэнтнага пункта), а ў 2027 годзе зноў паскорыцца да 2,8 %», — гаворыцца ў дакладзе арганізацыі.

СГА таксама чакае запаволення росту сусветнага тавараабароту да 1,4 % у выпадку, калі канфлікт зацягнецца. На думку экспертаў, пры захаванні высокіх цэн на нафту рост тавараабароту ў свеце сёлета можа замарудзіцца з 1,9 % да 1,4 %. Акрамя таго, СГА прагназуе, што краінам Персідскага заліва з-за блакіравання Армузскага праліва пагражае рост цэн на прадукты харчавання. 

«Краіны Персідскага заліва таксама сутыкаюцца з праблемай харчовай бяспекі: іх залежнасць ад імпарту складае ў сярэднім 75 % для рысу і перавышае 90 % для кукурузы, соевых бабоў і расліннага алею — тавараў, кошт якіх пры пастаўках па альтэрнатыўных маршрутах значна ўзрасце», — адзначаюць эксперты СГА.

Яны таксама нагадваюць, што краіны заліва адносяцца да ліку «буйных экспарцёраў як энергарэсурсаў, так і ўгнаенняў», таму доўгае перапыненне паставак у Армузскім праліве можа справакаваць ланцуговую рэакцыю ў харчовых сістэмах па ўсім свеце, пагоршыўшы наступствы ўжо існуючых экспартных абмежаванняў.