Чатырохногімі ўдзельнікамі мерапрыемства стануць больш за 50 пушысцікаў, якім будуць шукаць новыя сем’і. Таксама ў лакацыі пройдзе дабрачынны кірмаш. У «Кошыках дабра» можна будзе пакінуць корм, рэчы б/к і іншыя прадметы для жывёл.
У рамках лекторыя ветэрынарны ўрач Уладзімір Савельеў раскажа слухачам пра карысць стэрылізацыі і вакцынацыі жывёл, а яго калега Уладзімір Федасеенка — пра лячэнне каціных кан’юктывітаў і наступствы перанесеных інфекцый. У «Хвастатым двары» з 12:00 да 20:00 можна будзе пракансультавацца са спецыялістамі па грызунах, рэптыліях і іншых гадаванцах.
Акрамя таго, арганізатары рыхтуюць разнастайныя забавы для дзяцей і дарослых. Лялечны тэатр пакажа народныя казкі «Коцік, пеўнік і лісічка» і «Мушкі ў кашулях», байку «Дыпламаваны баран» і іншыя пастаноўкі. Таксама маленькіх удзельнікаў акцыі чакаюць розыгрышы і майстар-класы, выступленне штукара і дзіцячая забаўляльная праграма.
