У пачатку сустрэчы спікер Палаты прадстаўнікоў акцэнтаваў увагу, што супрацоўніцтва паміж Беларуссю і Зімбабвэ ў апошнія гады носіць у вышэйшай ступені актыўны характар.  

— У лютым наша краіна ў Савеце Рэспублікі прымала парламенцкую дэлегацыю Рэспублікі Зімбабвэ, якую ўзначальвала Старшыня Сената. Сёння ў нас другая сустрэча ў Палаце прадстаўнікоў, у сувязі з чым можна гаварыць пра паўнавартасныя кантакты паміж дзвюма палатамі Парламента. 

Адносіны паміж Мінскам і Харарэ атрымалі магутны імпульс дзякуючы кантактам лідараў нашых дзяржаў, падкрэсліў Ігар Сергяенка. 

— Гэта і візіт у Зімбабвэ ў 2023 годзе, і візіт Прэзідэнта Зімбабвэ ў 2025 годзе ў Беларусь, і сустрэча Прэзідэнта Рэспублікі Беларусь Аляксандра Лукашэнкі з Прэзідэнтам Рэспублікі Зімбабвэ Эмерсанам Мнангагвай, якая прайшла на мінулым тыдні. Беларусь нязменна разглядае Зімбабвэ ў якасці аднаго з ключавых палітычных і эканамічных партнёраў у Паўднёвай Афрыцы.  

Падпісанне Дарожнай карты стратэгічнага супрацоўніцтва і партнёрства на 2026 — 2030 гады, па словах Старшыні Палаты прадстаўнікоў, азнаменавала новы этап у развіцці двухбаковых сувязяў і дазволіла надаць больш сістэмны, прадметны, мэтанакіраваны і доўгатэрміновы характар супрацоўніцтва паміж нашымі дзяржавамі.  

— Наша сённяшняя сустрэча — яшчэ адзін крок да імплементацыі замацаваных у Дарожнай карце дамоўленасцяў аб развіцці кантактаў міжпарламенцкага вымярэння, — падкрэсліў Ігар Сергяенка. 

Як было адзначана ў ходзе сустрэчы, у Зімбабвэ паспяхова рэалізуюцца сумесныя з Беларуссю праекты ў сферы механізацыі сельскай гаспадаркі, якія ўносяць уклад у харчовую бяспеку краіны, ва ўмацаванне аграрнага сектара і павышэнне эфектыўнасці вытворчасці. Паміж краінамі пашыраецца супрацоўніцтва ў прамысловасці, фармацэўтыцы, адукацыі і іншых сацыяльна значных галінах. 

Старшыня Палаты прадстаўнікоў акцэнтаваў увагу, што Беларусь гатова садзейнічаць развіццю дзеючых беларускіх праектаў у Зімбабвэ і запуску новых. 

— Летась двухбаковы тавараабарот склаў больш за 26 мільёнаў долараў ЗША. Пастаўленая лідарамі нашых дзяржаў задача па дасягненні ўзаемнага тавараабароту ў аб’ёме 100 мільёнаў долараў ЗША з’яўляецца цалкам рэальнай, выканальнай. Вядома, пры ўмове ўзаемнага супрацоўніцтва і падыходаў да вырашэння праблем, якія ўзнікаюць. 

Вынікам рабочай сустрэчы ў Доме ўрада стала падпісанне Пагаднення аб супрацоўніцтве паміж Палатай прадстаўнікоў Нацыянальнага сходу Рэспублікі Беларусь і Нацыянальнай Асамблеяй Парламента Рэспублікі Зімбабвэ.  

Дакумент, выказаў упэўненасць спікер Палаты прадстаўнікоў, будзе садзейнічаць умацаванню сапраўднага братэрства і дружбы паміж краінамі. 

— Мяркую, што вядучую ролю ў рэалізацыі Пагаднення закліканы адыграць міжпарламенцкія групы дружбы — у Нацыянальным Сходзе нашай краіны такая група па супрацоўніцтве з Парламентам Рэспублікі Зімбабвэ ўжо сфарміравана, — адзначыў Старшыня Палаты прадстаўнікоў. — Чакаем хутчэйшага фарміравання аналагічнай групы ў вашым парламенце. 

Яна ВАЛАСАЧ 
Фота БелТА