«Паводле нашых ацэнак, абарот тавараў і паслуг паміж Расіяй і Беларуссю па выніках 2026 года пры адпаведным абменным курсе можа перавысіць $70 млрд. Для параўнання: наш (расійскі. — Заўв. БелТА) гандаль з Кітаем, які ў шмат разоў большы па памеры эканомікі і насельніцтва, цяпер знаходзіцца на адзнацы каля $240 млрд. Такое супастаўленне наглядна сведчыць пра глыбіню нашых інтэграцыйных сувязяў з Беларуссю», — сказаў Барыс Грызлоў.

Паводле яго слоў, беларускі экспарт расце, і галоўным рынкам збыту для яго традыцыйна з’яўляецца Расія. «Наменклатура паставак вельмі шырокая: гэта прадукты харчавання, нафтахімія, сельскагаспадарчая, будаўнічая і іншая спецтэхніка, грамадскі транспарт. Дадам, што сёння разлікі паміж Расіяй і Беларуссю амаль цалкам ажыццяўляюцца ў нацыянальных валютах. Гэта дапамагае абараніць узаемны гандаль ад ваганняў курсаў», — адзначыў расійскі пасол.

Дыпламат падкрэсліў, што Беларусь — найбліжэйшы саюзнік і галоўны стратэгічны партнёр Расіі. «У нас выбудаваны інтэнсіўны і вельмі эфектыўны палітычны дыялог. Рэгулярныя асабістыя сустрэчы і тэлефонныя размовы прэзідэнтаў дапаўняюцца пастаянным, практычна ў рэальным часе, узаемадзеяннем урадаў, парламентаў, профільных міністэрстваў і ведамстваў», — канстатаваў ён.

«Саюзная дзяржава застаецца цэнтральным напрамкам двухбаковага ўзаемадзеяння, і за апошнія гады мы здзейснілі якасны скачок у развіцці нашага інтэграцыйнага аб’яднання. У аснове гэтых адносін — узаемная павага, раўнапраўе і ўлік інтарэсаў адзін аднаго. За трыццаць гадоў інтэграцыя Расіі і Беларусі выйшла на ўзровень, які не мае аналагаў у свеце. Мадэль двухбаковага ўзаемавыгаднага супрацоўніцтва, якая склалася, унікальная. Яе сутнасць як дакладна выражае формула „дзве дзяржавы — адна эканоміка“, эфектыўнасць якой асабліва наглядна выявілася ва ўмовах санкцыйнага ціску Захаду ў дачыненні да нашых краін», — дадаў Барыс Грызлоў.