Кіраўнікі ўрадаў прадоўжылі абмеркаванне актуальнага парадку дня двухбаковага супрацоўніцтва. Аляксандр Турчын падкрэсліў, што за гады існавання «ІНАПРАМ» даказаў сваю важнасць для дзвюх краін. На пляцоўцы можна ацаніць дасягненні прамысловасці і намеціць далейшы план узаемадзеяння.

«Узаемаадносіны дэманструюць упэўнены рост. Па выніках пяці месяцаў мы дадалі больш за 20 % ва ўзаемным тавараабароце. Гэта сведчыць, што мы знаходзімся на правільным шляху. У рамках Саюзнай дзяржавы вырашаем пералік пытанняў і задач ва ўмовах беспрэцэдэнтнага санкцыйнага ціску, — адзначыў Аляксандр Турчын. — Упэўнены, што тэмп узаемных сустрэч, нашых дыскусій захаваецца».

Паводле слоў Прэм’ер-міністра, узаемадзеянне ўрадаў знаходзіцца на найвышэйшым узроўні. «Я ўдзячны, што вы заўсёды 24/7 на сувязі, і любыя пытанні, якія ў нас узнікаюць, аператыўна вырашаем», — адзначыў Аляксандр Турчын, звярнуўшы ўвагу, што па цэлым шэрагу кірункаў, якія ўчора абмяркоўваліся, ужо знойдзеныя развязкі. 

Таксама Прэм’ер-міністр Беларусі Аляксандр Турчын сустрэўся з першым намеснікам старшыні ўрада Расіі Дзянісам Мантуравым. Бакі разгледзелі пытанні прамысловай кааперацыі і імпартазамяшчэння. Аляксандр Турчын падкрэсліў, што ў дзвюх краінах рэалізуецца значная колькасць сумесных праектаў.

Як паведамлялася, выстава «ІНАПРАМ» пачала сваю работу ў Екацярынбургу. Краінай-партнёрам сёлета выступае Інданезія. Асноўная тэма выставы — «Індустрыя 360: вытворчасць без межаў». Асаблівая ўвага будзе нададзена фарміраванню гнуткіх вытворчасцяў, якія ствараюцца на стыку аўтаматызацыі, штучнага інтэлекту і адзіных індустрыяльных экасістэм.

Беларуская экспазіцыя на выставе аб’яднала больш за 20 вядучых прадпрыемстваў: Беларускі металургічны завод, «Інтэграл», «Белкамунмаш», Мінскі аўтамабільны завод, Мінскі трактарны завод, «Магілёўліфтмаш» і іншыя флагманы прамысловасці. На стэндзе Made in Belarus прадставілі шырокую лінейку прадукцыі: ад металапракату і мікраэлектронікі да сучасных узораў электратранспарту і медыцынскага абсталявання.