Пазачарговае пасяджэнне камісіі правялі сёння ў сувязі з пагаршэннем умоў надвор’я. Адпрацавана ўзаемадзеянне ўсіх службаў пры праходжанні цыклону «Улі» і ліквідацыі яго наступстваў. 

«У цэлым на балансе нашага прадпрыемства каля 13 тыс. км дарог мясцовага значэння і вуліц сельскіх населеных пунктаў. Працуем з 25 снежня ў кругласутачным рэжыме. У нас ёсць для барацьбы з зімовай слізкасцю 197 адзінак тэхнікі. Зараз працуюць каля 150. Пясчана-салянай сумессю забяспечаны. Усе ведаюць, што рабіць», — сказаў генеральны дырэктар КУП «Брэстаблдарбуд» Сяргей Панчанка. Ён звярнуў увагу, што найбольш складаная сітуацыя прагназуецца на Палессі. 

Па тэрыторыі Брэсцкай вобласці праходзіць практычна 2,5 тыс. км рэспубліканскіх дарог, якія знаходзяцца ў распараджэнні РУП «Брэстаўтадар». «На дадзены момант у нас на дарогах працуе 65 адзінак тэхнікі. Плануецца, што будзе працаваць 87 снегаачышчальных МАЗаў, 35 пагрузчыкаў, 14 аўтагрэйдараў, і 58 трактароў МТЗ», — расказаў генеральны дырэктар «Брэстаўтадара» Уладзімір Пунько. 

Тэхніка забяспечвае праязджальнасць на дарогах. Спецыялісты звярнуліся да вадзіцеляў з просьбай адмовіцца ад далёкіх паездак без неабходнасці. «Снег узмацняецца, вецер узмацняецца. Пік перадаюць да ночы. Мы просім, каб людзі прытрымліваліся бяспечнай язды. Калі магчыма, лепей нікуды не ехаць. Гэта складаныя ўмовы надвор’я. На заўтра аб’яўлены чырвоны ўзровень небяспекі», — растлумачыў Уладзімір Пунько. 

Вуліцы гарадоў і гарадскіх пасёлкаў на дадзены момант чысцяць ад снегу больш за 160 адзінак тэхнікі ЖКГ. «Адпрацавана дадатковае выдзяленне тэхнікі ад іншых прадпрыемстваў. Падрыхтаваны генератары на выпадак адключэнняў. Пясчана-салянай сумесі хапае. Дыспетчарскія службы працуюць у кругласутачным рэжыме», — праінфармаваў генеральны дырэктар абласнога ўнітарнага прадпрыемства «Упраўленне ЖКГ» Аляксандр Максімчук. Пры моцных ападках у Брэсцкай вобласці камунальнікі гатовы задзейнічаць каля 600 адзінак снегапрыборачнай тэхнікі. Падрыхтаваны таксама снегапрыборачныя рыдлёўкі для насельніцтва. Усе ахвотныя могуць дапамагчы ў расчыстцы снегу на дваровых тэрыторыях. Для гэтага трэба звярнуцца ў мясцовую ЖКГ.

У Брэсцкай вобласці аб’яўлены павышаны ўзровень небяспекі з-за моцнага снегу ў многіх раёнах. Чакаюцца парывы ветру да 15-20 м/с. Паводле прагнозаў сіноптыкаў, стыхія больш за ўсё закране цэнтральныя і ўсходнія раёны Брэстчыны — Драгічынскі, Бярозаўскі, Івацэвіцкі, Іванаўскі, Пінскі, Столінскі, Лунінецкі, Ганцавіцкі, Ляхавіцкі, Баранавіцкі раёны, Баранавічы і Пінск.