Зусім няшмат застаецца да вялікага аграрнага старту: беларускія аграрыі ва ўсіх рэгіёнах краіны актыўна рыхтуюцца да вясенне-палявых работ. Гаспадаркі запасаюцца палівам, насеннем, угнаеннямі, правяраюць спраўнасць тэхнікі. У кожнага рэгіёна свае выразныя задачы на сезон. Пры гэтым усе разумеюць важнасць пасяўной кампаніі. Задача — не страціць каштоўны час і своечасова выйсці ў поле. 

Для таго, каб праверыць, як ідзе падрыхтоўка да чарговага сельскагаспадарчага сезона, Старшыня Палаты прадстаўнікоў, упаўнаважаны прадстаўнік кіраўніка дзяржавы ў Віцебскай вобласці Ігар Сергяенка з рабочай паездкай адправіўся на поўнач нашай краіны — Віцебшчыну. На працягу двух дзён: 19 і 20 сакавіка спікер правярае гатоўнасць сельгаспрадпрыемстваў вобласці да вясенне-палявых работ. 

«Тэхніка гатовая ўжо даўно»

У першы дзень рабочай паездкі Старшыня Палаты прадстаўнікоў азнаёміўся з дзейнасцю шэрагу сельгасарганізацый Шаркаўшчынскага і Браслаўскага раёнаў. Першым пунктам на маршруце дэлегацыі стала гаспадарка ААТ «Княж», што знаходзіцца ў аграгарадку Германовічы Шаркаўшчынскага раёна. На прадпрыемстве працуюць 172 чалавекі. У распараджэнні гаспадаркі — 44 трактары, 5 кормаўборачных і 8 збожжаўборачных камбайнаў. Плошча сельгасугоддзяў — 7772 гектары, у тым ліку раллі — 5162 гектары. Валавы збор збожжавых у 2025 годзе склаў 4827 тон пры сярэдняй ураджайнасці — 22,8 цэнтнера з гектара. 

Падчас наведвання механізатарскага двара сельгаспрадпрыемства гаворка ішла пра тое, якая тэхніка на хаду і якія яе магутнасці, а таксама наколькі аператыўна праводзіцца рамонт няспраўных агрэгатаў і што яшчэ трэба арганізацыі для паспяховай работы ў палях. Зямля ў гаспадарцы цяжкая, таму тэхніка патрэбна дастаткова магутная. 

Як адзначыў у размове з журналістамі дырэктар ААТ «Княж» Уладзімір Буда, сёння ў сельгаспрадпрыемстве працуе 36 механізатараў. «Агульнае пагалоўе гаспадаркі складае 3200 галоў. З іх 1300 — дойныя. Сельгасарганізацыя спецыялізуецца на вытворчасці малака і мяса, а таксама вырошчванні бычкоў для патрэб гаспадаркі, — звяртае ўвагу яе кіраўнік. — На сённяшні дзень наша гаспадарка цалкам укамплектаваная ўсімі неабходнымі спецыялістамі». 

Закранаючы тэму гатоўнасці выхаду на вясенне-палявыя работы, Уладзімір Буда адзначыў: «Пакуль глеба яшчэ сырая, мы займаемся сяўбой шматгадовых траў. Прыступаем да падкормкі азімых збожжавых. Тэхніка гатовая ўжо даўно. Чакаем, калі надвор’е дазволіць выехаць у поле. Я думаю, пасеем у тэрмін і без праблем». 

Кіраўнік гаспадаркі таксама расказаў аб планах на перспектыву. Паводле яго слоў, сёння ідзе актыўнае будаўніцтва новага комплексу на 800 галоў. Акрамя таго, тут плануюць пабудаваць новы прафілакторый для цялят. У наступным годзе таксама запланавана будаўніцтва цэха для запуску. «Перад намі стаіць задача па абнаўленні тэхнікі. Мы ўжо атрымалі новыя экакультыватары і камбайн, у бліжэйшым часе наш мехдвор папоўняць яшчэ два трактары», — пералічыў Уладзімір Буда, падкрэсліўшы, што абнаўленне тэхнікі прадпрыемства дазволіць дамагчыся лепшых вынікаў на пасяўной.

Нацыянальная бяспека, сацыяльна-эканамічнае развіццё краіны, сацыяльныя сеткі

Другім пунктам на маршруце спікера стаў Шаркаўшчынскі райвыканкам. Тут адбылася ажыўленая сустрэча са школьнай і працоўнай моладдзю, ідэалагічным актывам, прадстаўнікамі грамадскіх аб’яднанняў і палітычных партый раёна. Ігар Сергяенка падрабязна расказаў аб ключавых напрамках дзейнасці Палаты прадстаўнікоў, а таксама аб планах дэпутацкага корпуса на пяцігодку. Таксама ён закрануў тэму нацыянальнай бяспекі, якую забяспечваюць не толькі ваеннаслужачыя, але і супрацоўнікі праваахоўных органаў, ратавальнікі. Моладзь даведалася, якая няпростая абстаноўка складваецца вакол Беларусі і якія меры прымаюць у нашай дзяржаве для абароны суверэнітэту і нашых грамадзян.

Ігар Сергяенка расказаў і аб сацыяльна-эканамічным развіцці нашай краіны, адзначыўшы, што законы ў гэтай сферы накіраваны на паляпшэнне ўзроўню жыцця беларусаў, у тым ліку ў рэгіёнах. Напрыклад, сёлета плануюць завяршыць газіфікацыю ў Лужках і Германовічах у Шаркаўшчынскім раёне. Старшыня Палаты прадстаўнікоў падкрэсліў, што за мяжой ведаюць і высока цэняць нашу прадукцыю — аграрную тэхніку, харчовыя тавары, адзенне — і для замежнікаў брэнд «Зроблена ў Беларусі» з’яўляецца сінонімам якасці. Спікер таксама нагадаў, што гэты год прысвечаны беларускай жанчыне і ахова мацярынства ў краіне мае адно з першарадных значэнняў.

Размова з моладдзю прайшла ў фармаце адкрытага дыялогу. Маладыя людзі задавалі пытанні аб задачах для дэпутатаў на пяцігодку, найбольш вострых тэмах, якія хвалююць грамадзян і з якімі яны прыходзяць на асабістыя прыёмы. Ігар Сергяенка адзначыў, што ў сельскай мясцовасці, напрыклад, ёсць праблемы з якасцю сотавай сувязі, станам дарог, паступаюць скаргі ад землекарыстальнікаў. Ён падкрэсліў, што ўсе звароты аналізуюцца для карэкціроўкі законаў на высокім узроўні. 

Абмеркавалі ўдзельнікі мерапрыемства і здаровы лад жыцця. Так, прадстаўніца медыцынскай прафесіі адзначыла, што якасць жыцця ў насельніцтва, асабліва ў дзяцей, упала з-за недахопу сну, няправільнага харчавання і малой актыўнасці. Яна лічыць, што неабходна ў школах тлумачыць падрастаючаму пакаленню, якую ежу лепш за ўсё ўжываць, каб быць здаровымі, чаму неабходна займацца фізкультурай і як захаваць бадзёрасць і рухавасць да сталага ўзросту. Самыя юныя ўдзельнікі сустрэчы пацікавіліся, ці карыстаецца Ігар Сергяенка сацыяльнымі сеткамі. Ён адказаў, што кожны працоўны дзень пачынае з інфармацыйнага агляду, аддае перавагу афіцыйным каналам і імкнецца быць у курсе апошніх падзей у краіне і за мяжой. Кіраўнік дэпутацкага корпуса перасцярог моладзь ад фэйкавых укідаў і заклікаў аналізаваць усё, што маладыя людзі чытаюць у сеціве.

«Настрой у калектывах рабочы»

Ігар Сергяенка таксама наведаў некалькі сельгаспрадпрыемстваў у Браслаўскім раёне, дзе азнаёміўся з гатоўнасцю тэхнікі, удакладніў, ці хапае паліва для машын і як зараджаны аграрыі на будучую пасяўную, пасля чаго адказаў на пытанні журналістаў.

«Віцебская вобласць прыступае да вясенне-палявых работ на наступным тыдні. Фактычна, ужо сёння ў Глыбоцкім раёне прыступілі да сяўбы яравых, — паведаміў Ігар Сергяенка. — Сёння я паглядзеў, як арганізавана падрыхтоўка тэхнікі ў гаспадарках Шаркаўшчынскага і Браслаўскага раёнаў. Што хацелася б адзначыць? Настрой у калектывах рабочы. Некаторыя так і кажуць, што ўжо засумавалі па працы, хочуць выйсці ў поле». 

Гаворачы аб гатоўнасці сельскагаспадарчай тэхнікі да выхаду ў палі, спікер канстатаваў: гатоўнасць 95-98 %. Энерганасычаная тэхніка, трактары, пасяўныя агрэгаты, плугі — амаль уся сельгастэхніка гатовая. «Снег фактычна сыходзіць з палёў, глеба халодная яшчэ, аграрыі вядуць падкормку азімых ужо адпаведнымі прэпаратамі. Ну і гатоўнасць высокая, — звярнуў увагу Ігар Сергяенка. — Ва ўсякім разе, настроенасць на гэта ёсць, людзі гатовыя».

Для паспяховага выхаду тэхнікі ў поле, на думку Старшыні Палаты прадстаўнікоў, аграрыям варта дадаць у арганізацыі работ. Неабходна, каб на час правядзення вясенне-палявых работ была мабільна арганізавана падача запасных частак у выпадку выхаду сельгастэхнікі са строю. Акрамя таго, неабходна граматна арганізаваць працоўны дзень, размяркоўваючы сельгастэхніку па тых аб’ектах, дзе яна найбольш запатрабавана. «У прынцыпе, з пачаткам актыўных работ, думаецца, што ўсё будзе арганізавана на належным узроўні», — выказаў упэўненасць спікер.

«Важна агульнымі намаганнямі зрабіць і край, і раён камфортным для пражывання людзей»

Ігар Сергяенка таксама адзначыў важнасць правядзення сустрэч з моладзю. Каменціруючы сваю сустрэчу, якая раней адбылася ў Шаркаўшчынскім райвыканкаме, спікер падкрэсліў: «Гаворка ішла аб надзённых праблемах і працоўнай, і школьнай моладзі. Маладыя людзі задавалі пытанні, якія датычацца працаўладкавання, замацавання кадраў на вёсцы, заканатворчай дзейнасці. Атрымаўся цікавы абмен меркаванняў».

Старшыня Палаты прадстаўнікоў таксама канстатаваў, што ў маладых людзей сапраўды прысутнічае любоў да роднага краю. «Так, раён невялікі, райцэнтр таксама. Тры гады таму прайшлі „Дажынкі“, змянілася аблічча. І, вядома, важна агульнымі намаганнямі зрабіць і край, і раён камфортным для пражывання людзей. Гэта і працоўныя месцы, і добраўпарадкаванне, і дарогі, і медыцынскае забеспячэнне. У гэтым плане, вядома, трэба дадаць», — рэзюмаваў Ігар Сергяенка.

У другі дзень рабочай паездкі спікер прыме ўдзел у адкрытым пасяджэнні Браслаўскага райвыканкама. Галоўнымі тэмамі пасяджэння стануць сацыяльна-эканамічнае развіццё раёна, павышэнне эфектыўнасці работы прадпрыемстваў, меры па падрыхтоўцы да правядзення веснавых палявых работ. 

У Браславе Ігар Сергяенка таксама ўручыць падзякі найлепшым спецыялістам раёна падчас урачыстага мерапрыемства, прысвечанага падвядзенню працоўных вынікаў 2025 года.

Данііл ХМЯЛЬНІЦКІ

Фота БелТА

Шаркаўшчынскі раён