Па словах амерыканскага лідара, для яго «вялікі гонар падаць іск аб паклёпе і дыскрэдытацыі супраць the New York Times», якую ён ахарактарызаваў як «рупар леварадыкальнай Дэмакратычнай партыі» і адну з «горшых газет у гісторыі» краіны. Як вынікае з заявы Трампа, пазоў на суму $15 млрд пададзены ў штаце Фларыда.

Кіраўнік Белага дома абвінаваціў выданне ў адкрытай падтрымцы яго суперніцы на прэзідэнцкіх выбарах 2024 года, на той момант віцэ-прэзідэнта краіны Камалы Харыс, а таксама ў паклёпе на адрас яго і членаў яго сям’і і акружэння.

У ліпені амерыканская тэлекампанія CBS абвясціла аб закрыцці «Позняга шоу» (The Late Show), вядучы якога Стывен Кольбер быў адным з самых актыўных крытыкаў прэзідэнта Дональда Трампа ў сегменце вячэрняга тэлебачання ЗША. Раней медыяхолдынг Paramount Global пагадзіўся выплаціць $16 млн для спынення суда паводле іску Трампа, які абвінаваціў канал ва ўмяшанні ў выбары 2024 года шляхам рэдагавання інтэрв’ю з Харыс.

Дэмакраты крытыкавалі гэтую здзелку, лічачы, што Paramount мог бы выйграць гэтую справу ў судзе, але вырашыў не канфліктаваць з прэзідэнтам з-за патэнцыйных праблем з атрыманнем адабрэнняў рэгулятараў пры рэфармаванні свайго бізнесу.