Кіраўнік назваў некалькі элементаў, якія сур’ёзна ўплываюць на ўмацаванне турыстычнай інфраструктуры. Так, імпульс забяспечвае як дзяржпадтрымка, так і прыватная ініцыятыва. «Урадам прадугледжаны добры крэдытны прадукт для развіцця турыстычнага патэнцыялу. Гэта выдзяленне крэдыту пад 6%, сума да 100 млн рублёў. Гэта той элемент, які з’яўляецца вельмі важным для таго, каб мы мадэрнізавалі сваю інфраструктуру. Не проста мадэрнізавалі, але і стварылі прынцыпова новую інфраструктуру, якая адпавядала б сучасным рэаліям і была высакаякаснай», — адзначыў ён.

Немалаважна, на думку Кірыла Машарскага, і ўмацаваць усесезонны характар турызму, каб у Беларусь прыязджалі госці ў любую пару года. Для гэтага важна таксама адпаведная інфраструктура.

Яшчэ адзін элемент — трансгранічныя туры. «Напрыклад, у Расійскую Федэрацыю добра едуць грамадзяне КНР, Індыі. Мы таксама актыўна працуем над тым, каб у нас таксама было больш кітайскіх турыстаў. І ў сувязі з гэтым мы прапануем нашым калегам, каб яны ў свае туры па Расіі ўключалі і горад Мінск. Як варыянт — тур Мінск — Пецярбург — Масква. Тым больш і ў Беларусі, і ў Расіі бязвізавы рэжым з Кітаем», — абазначыў адну з ідэй дырэктар Нацыянальнага агенцтва па турызме.

Кірыл Машарскі падкрэсліў, што гэта пытанне было абмеркавана з Міністэрствам эканамічнага развіцця Расіі, адказным рэгулятарам за турызм. Папярэдне расійскі бок праявіў цікавасць да гэтай ідэі.