У турніры прымаюць удзел каманды са спецыяльных школ (школ-інтэрнатаў), дамоў-інтэрнатаў для людзей з асаблівасцямі псіхафізіялагічнага развіцця. Геаграфія шырокая — Гродна, Васілішкі, Шчучын, Рудзенск, Чэрвень, Улукаўе, Гомель, Рэчыца.

«Сёння праходзіць рэспубліканскі турнір па настольным тэнісе „Спешыял Алімпікс“, і гэта традыцыйны штогадовы красавіцкі турнір. Ужо другі раз ён праходзіць у горадзе Гродна, у СДЮШАР імя Ю. К. Кульціясава, таму што гэта другая па значнасці пляцоўка па настольным тэнісе ў нашай краіне. І, вядома, тут судзейская калегія, якая ўжо спрацавалася з намі, а мы спрацаваліся з ёй. Гэта цудоўныя суддзі высокага ўзроўню, — сказала выканаўчы дырэктар Беларускага камітэта „Спешыял Алімпікс“ Ларыса Таболіна. — Хлопцы і дзяўчаты трэніраваліся, вельмі перажывалі. Для іх гэта вельмі значна. Таксама нам прыемна, што сёння прысутнічаюць дзве новыя каманды».

Як падкрэсліваюць арганізатары, наяўнасць настольнага тэніса ў спісе традыцыйных спаборніцтваў «Спешыял Алімпікс» невыпадковая. Гэты від спорту не патрабуе шмат энергіі, у адрозненне ад камандных відаў спорту. Разам з тым ён дае магчымасць трэніраваць хуткасць, вынослівасць і канцэнтрацыю на якім-небудзь відзе дзейнасці, плюс у настольнага тэніса дастаткова простыя правілы.

Выхавальнік Чэрвеньскага дзіцячага сацыяльнага пансіяната «Ігуменскі» Аляксандр Гляцэвіч расказаў, што яго выхаванцы не ўпершыню прымаюць удзел у спаборніцтвах «Спешыял Алімпікс». «Ездзім рэгулярна. Хлопцы і дзяўчаты з задавальненнем гуляюць, яны любяць гэты від спорту і наогул спаборніцтвы любыя. Ці гэта лёгкая атлетыка, ці гэта баскетбол, ці гэта футбол. Яны чакаюць гэту атмасферу і так чакаюць гэтага дня, каб паехаць на спаборніцтвы. Вось у мінулым годзе нам пашанцавала, мы ў бочэ занялі першае месца, і ў боўлінгу. Якія яны задаволеныя. І сёння, як і заўсёды, яны настроены на перамогу, але тут як паспрыяе ўдача», — сказаў ён.

Удзельнік турніру з Чэрвеня Юрый Несцер расказаў, што любіць займацца спортам: «Я люблю ўсё. Мне падабаецца тэніс, плаваць, займаюся бегам, баскетболам, футболам. Сёння мне хочацца сумленна перамагчы, я шмат трэніраваўся, дзякуй Аляксандру Мікалаевічу (Аляксандру Гляцэвічу. — Заўв. БелТА), што ён мяне трэніраваў, вучыў».

Мае намер праявіць сябе за тэнісным сталом і Наталля Кавалеўская са Шчучынскага раёна. «Мне вельмі падабаецца спорт, люблю валейбол, футбол, тэніс, бочэ, боўлінг і шашкі. Сёння мы гатовы перамагчы. Мы настроены толькі на перамогу, добра згуляць з нашымі сапернікамі», — адзначыла дзяўчына.

Традыцыйна Беларускі камітэт «Спешыял Алімпікс» правядзе ў маі спаборніцтвы па футболе. У чэрвені-ліпені адбудзецца міжнародны турнір па футболе з удзелам расійскіх каманд у Магілёве. Таксама ў бліжэйшых планах міжнародныя спаборніцтвы па бочэ ў Брэсце.