Увечары 2 сакавіка ў МНС паступіла паведамленне аб пажары ў кватэры дзевяціпавярховага дома на вуліцы Будаўнікоў у Маладзечне.

«Калі ратавальнікі прыехалі да месца інцыдэнту, кватэра на сёмым паверсе гарэла адкрытым полымем. Пры правядзенні разведкі і тушэнні ачага ўзгарання ратавальнікі выявілі двух загінулых. Пры гэтым, паводле папярэдняй інфармацыі, да прыбыцця падраздзяленняў МНС мужчына, які знаходзіўся ў падпаленай кватэры, выскачыў з акна. Пасля правядзення рэанімацыйных мерапрыемстваў медыцынскімі работнікамі канстатаваная яго смерць», — паведамілі ў прэс-службе. 

Пажар ліквідаваны ратавальнікамі. Для гэтага спатрэбілася 7 адзінак тэхнікі МНС. Абставіны і прычына здарэння высвятляюцца.

У МНС папярэджваюць: будзьце асцярожныя з агнём, выконвайце элементарныя правілы пажарнай бяспекі. Устанавіце аўтаномны пажарны апавяшчальнік.