Пашырэнне плошчаў перапрацоўкі малака з навацыйнымі падыходамі

Плошча будучай вытворчасці — каля 8 га. Цяпер тут актыўнымі тэмпамі вядзецца будаўніцтва сучаснага малакаперапрацоўчага завода, які ўвойдзе ў склад Шклоўскага масларобнага завода і адкрые новую старонку ў развіцці харчовай прамысловасці раёна і Магілёўскай вобласці.

«Гаспадарка „Купалаўскае“ (у склад якой уваходзіць масларобчы завод) здольна пастаўляць 240 т малака за суткі — цяпер такую колькасць мы перапрацаваць не можам. А са з’яўленнем новага завода мы зможам поўнасцю перапрацоўваць гэту сыравіну сваімі сіламі, — расказаў першы намеснік дырэктара — галоўны інжынер ААТ „Шклоўскі масларобны завод“ Андрэй Секацкі. — Таксама ў „Купалаўскага“ ёсць перспектыўны план развіцця да 2034 года, які дазволіць цалкам забяспечыць новую вытворчасць малаком».

Зараз на будаўнічай пляцоўцы ўзводзіцца трохпавярховы адміністрацыйны будынак, таксама закладзена аснова пад вытворчы корпус. Дададуцца ачышчальныя збудаванні, свая воданапорная, кацельня, кампрэсарная і іншыя аб’екты. Усе працы вядуцца ў адпаведнасці з графікам. Як адзначыў Андрэй Секацкі, многія ключавыя моманты па будаўніцтве вырашаны, падпісаны кантракт на пастаўку неабходнага тэхналагічнага абсталявання.

«На гэты момант наша прадпрыемства перапрацоўвае па сыравіне арыенціровачна 100 т малака ў суткі. Мы выпускаем поўную лінейку натуральнамалочнай прадукцыі: малако, смятана, вяршкі, — расказаў ён. — Для далейшага росту нашага прадпрыемства будуецца новая пляцоўка, якая дасць магчымасць павялічыць прадукцыйную магутнасць завода да 300 т».

Што немалаважна — новы завод дазволіць стварыць яшчэ каля 100 працоўных месцаў. Сучасную і высокатэхналагічную вытворчасць прыцягне ў раён больш спецыялістаў, у тым ліку маладых. Бо для іх ствараюцца ўсе ўмовы для замацавання і камфортнай працы.

Акрамя гэтага, новыя магутнасці дазволяць пашырыць і лінейку прадукцыі, якую раней шклоўскае прадпрыемства не выпускала: мяккі тварог, тварожны сметанковы сыр, паўфабрыкаты з тварагу. А гэта — новыя магчымасці для экспарту.

«Цяпер у нас каля 60-70 працэнтаў — гэта экспартная прадукцыя, якая пастаўляецца на рынак Расійскай Федэрацыі: Санкт-Пецярбург, Бранск, Смаленск і іншыя бліжэйшыя расійскія гарады. Экспартныя паказчыкі пасля ўвядзення ў строй новага завода ўзрастуць, — расказаў ён. — Мы стараемся напоўніць сваю вытворчую пляцоўку самым сучасным абсталяваннем з аўтаматызаванымі працэсамі. Гэта дазволіць зменшыць сабекошт прадукцыі, зрабіць яе больш даступным».

Увесці новы аб’ект у эксплуатацыю плануюць ужо напрыканцы наступнага года.

Палепшаная якасць і граматная лагістыка — аб плюсах мадэрнізаванага камбікормавага завода

Пляцоўка былога камбікормавага цэха практычна поўнасцю змянілася.

«На гэтым аб’екце праведзена ўжо вялікая работа, якая ў далейшым дасць магчымасць выпускаць якасную прадукцыю — розныя віды камбікорму. Скончана рэканструкцыя вагавага абсталявання — цяпер ідзе наладка, добраўпарадкаванне тэрыторыі. Былі мадэрнізаваны ёмістасці для захоўвання збожжа — усяго іх 12, кожная аб’ёмам па 2 тыс. т. Правялі рэканструкцыю лабараторна-адміністрацыйнага будынка з бытавымі ўмовамі для работнікаў і пунктам харчавання, паслугамі якога змогуць у далейшым карыстацца ўсе жадаючыя, — расказаў генеральны дырэктар РУП „Купалаўскае“ — кіруючая кампанія холдынгу» Дзмітрый Лушакоў.  — З улікам таго, якія задачы стаяць у нас па вытворчасці малака, без якаснага камбікорму такіх паказчыкаў не дасягнуць: нам трэба павышаць удоі, каб забяспечыць сыравінай новы малакаперапрацоўчы завод».

Праект для раёна вельмі важны. «У сельскагаспадарчых арганізацыях раёна налічваецца больш як 60 тыс. пагалоўя буйной рагатай жывёлы, з іх амаль 22 тыс. галоў — гэта дойны статак, — расказаў першы намеснік старшыні — начальнік упраўлення па сельскай гаспадарцы і харчаванні Шклоўскага райвыканкама Аляксандр Дзівакоў. — Мы прадаем 320 т за дзень малака — гэта нядрэнная лічба, але яе трэба павялічваць. Без своечасовага і якаснага забеспячэння камбікормам гэтага зрабіць немагчыма».

У Шклоўскім раёне шэраг сельскагаспадарчых арганізацый закупляе яго на Клімавіцкім камбінаце хлебапрадуктаў і Бабруйскім камбінаце хлебапрадуктаў. «Адлегласць да Клімавіч 180 км, а да Бабруйска — 150. Гэта вялікая лагістычная нагрузка на прадпрыемствы для забеспячэння свайго пагалоўя неабходнай колькасцю камбікорму. Увядзенне ў эксплуатацыю завода забяспечыць у поўным аб’ёме кармамі пагалоўе холдынгу „Купалаўскі“ і сельскагаспадарчых арганізацый, якія не ўваходзяць у яго склад», — сказаў на заканчэнне Аляксандр Дзівакоў.

У дапамогу сельскагаспадарчым арганізацыям раёна і не толькі — як будзе працаваць абноўлены аграсэрвіс

Абнаўляюць у Шклове і плошчы аграсэрвісу.

«У будучыні тут з’явіцца рамонтная майстэрня на базе Шклоўскага райаграсэрвісу. Яна будзе прызначана для правядзення якаснага і своечасовага рамонту сельскагаспадарчай тэхнікі, у тым ліку энерганасычанай і імпартнай. На сёння гаспадаркі не валодаюць спецыялістамі, неабходнымі памяшканнямі і абсталяваннем для правядзення якаснага рамонту. Наша пляцоўка дазволіць гэта рабіць, — расказаў галоўны інжынер РУП „Купалаўскае“ — кіруючая кампанія холдынгу» Юрый Касенка.

На выбранай пляцоўцы абсталююць пяць пастоў для энерганасычанай і імпартнай тэхнікі. «Работы па будаўніцтву ў нас стартавалі ў пачатку ліпеня. На гэты момант ужо адбіты меткі для катлавана. Да канца ліпеня падрыхтуюць фундамент, паставяць неабходныя металаканструкцыі, падрыхтуюць сэндвіч-панэлі, — адзначыў ён. — Гэта будзе лёгкаўзведзеная канструкцыя, якая не ўступае ў надзейнасці і трываласці іншым канструкцыям».

З’явяцца тут і амаль тры дзясяткі новых працоўных месцаў, у тым ліку інжынерна-тэхнічныя работнікі. Увесці майстэрню ў эксплуатацыю плануюць ужо ў лістападзе гэтага года.

Як адзначыў дырэктар ЗАТ «Вялікія Славені» Іван Барташэвіч, якасць падрыхтоўкі сельскагаспадарчай тэхнікі заўсёды знаходзіцца пад самым пільным кантролем. «У нашай гаспадарцы шмат энерганасычанай тэхнікі, 3 кормаўборачныя камбайны, 7 энерганасычаных трактароў, 8 збожжаўборачных камбайнаў — складаная тэхніка, якую нашы механізатары ў існуючых умовах не могуць якасна адрамантаваць. Таму мы аддаём у спецыялізаваныя арганізацыі каробкі, масты, рухавікі, — падзяліўся ён. — Будаўніцтва і ўвядзенне ў эксплуатацыю аграсэрвісу дапаможа нам на месцы выконваць складаныя работы».

Аб планах на будучыню

РУП «Купалаўскае» — кіруючая кампанія холдынгу" — гэта сельскагаспадарчая арганізацыя, якая дынамічна развіваецца. У яго склад уваходзяць пяць гаспадарак: ОАО «Новагародзішчанскае», ААТ «Любінічы-Агра», ЗАТ «Вялікія Славені», ААТ «Александрыйскае», ЗАТ «АСБ-Агра Гарадзец» і адна вытворчасць — ААТ «Шклоўскій масларобчы завод». Цяпер тут 44 тыс. сельгасугоддзяў, з іх 35 тыс. — ворных.

Планы на перспектыву ў «Купалаўскага» больш чым сур’ёзныя — новыя вытворчасці, нарошчванне аб’ёмаў сыравіны для загрузкі сваіх магутнасцей і яе рэалізацыі. А яшчэ — стварэнне новых працоўных месцаў і ўмоў для замацавання кадраў.

«Улічваючы маштаб праектаў па мадэрнізацыі існуючых магутнасцей і ўзвядзенню новых аб’ектаў, у нас ідзе будаўніцтва 40-кватэрнага жылога дома для работнікаў „Купалаўскага“ ў Шклове. Прэзідэнтам раней была пастаўлена задача ўзводзіць жыллё там, дзе пашыраецца вытворчасць, — адзначыў Дзмітрый Лушакоў. — У жніўні мы чакаем маладых спецыялістаў: інжынераў: інжынераў, якія неабходны для аграсэрвісу, тэхнолагаў на малочны завод і вытворцаў».

Сельская гаспадарка, як і любая іншая галіна, знаходзіцца ў пастаянным руху. І такая пільная ўвага да мадэрнізацыі, удасканалення падыходаў і пошуку новых рашэнняў, лічыць генеральны дырэктар РУП «Купалаўскае» — кіруючая кампанія холдынгу«, цалкам апраўдана. «Своечасовая мадэрнізацыя і будаўніцтва новых аб’ектаў — гэта заўсёды ўклад у будучыню, які на працягу многіх гадоў будзе прыносіць прыбытак і карысць раёну і вобласці. А яшчэ такія падыходы заўсёды прыцягваюць моладзь — бо яны бачаць сучасную і тэхналагічную вытворчасць, — расказаў Дзмітрый Лушакоў. — Яшчэ адзін важны напрамак развіцця сельскай гаспадаркі — цыфравізацыя. Гэта не скароціць людскі рэсурс, але дазволіць укараняць ноу-хау для дасягнення агульных мэт і задач па забеспячэнні харчовай бяспекі».