УЕФА, КАНКАКАФ і Азіяцкая канфедэрацыя футбола апублікавалі сумесную заяву, у якой жорстка раскрытыкавалі кіраўніцтва Міжнароднай федэрацыі футбола (ФІФА) і прэзідэнта арганізацыі Джані Інфанціна.

Падставай для канфлікту стаў праект FIFA Forward Enterprise (FFE), аб стварэнні якога ФІФА аб’явіла раней. Меркавалася, што новая кампанія аб’яднае камерцыйныя кірункі арганізацыі і дзейнасць па правядзенні турніраў, а прыватным інвестарам будзе прапанавана набыць долі ў структуры.

Ініцыятыва выклікала сур’ёзную незадаволенасць унутры футбольнай супольнасці. У прыватнасці, з’явілася інфармацыя аб магчымым байкоце чэмпіянату свету 2030 года. Пазней Інфанціна заявіў, што праект не будзе рэалізаваны, прызнаўшы наяўнасць рознагалоссяў вакол гэтай ідэі.

Аднак УЕФА, КАНКАКАФ і AФК палічылі тлумачэнні кіраўніка ФІФА недастатковымі. У сумесным звароце канфедэрацыі падкрэслілі, што развіццё сусветнага футбола на працягу апошніх гадоў стала вынікам калектыўнай работы, а не заслугай аднаго чалавека ці адной арганізацыі.

Аўтары заявы зазначылі, што пашырэнне міжнародных турніраў, вызначэнне гаспадароў чэмпіянатаў свету 2030 і 2034 гадоў, а таксама размеркаванне фінансавых рэсурсаў паміж нацыянальнымі асацыяцыямі прымаліся ў выніку сумесных рашэнняў.
Пры гэтым канфедэрацыі асобна падкрэслілі: іх прэтэнзіі не звязаны з фінансавым размеркаваннем ці магчымым скарачэннем падтрымкі нацыянальных федэрацый.

«Гаворка ідзе пра нешта больш фундаментальнае: пра цэласнасць гульні і сумленнасць тых, хто выбраны ёю кіраваць», — гаворыцца ў заяве.

УЕФА, КАНКАКАФ і AФК таксама раскрытыкавалі падыход ФІФА да прасоўвання праекта FFE. На іх думку, ініцыятыва была прадстаўлена ў сціслыя тэрміны і без паўнацэннага абмеркавання з асацыяцыямі — членамі арганізацыі.

У канфедэрацыях лічаць: тое, што адбылося, нельга растлумачыць выключна памылкамі ў камунікацыі. Па іх ацэнцы, сама спроба перадаць прыватным інвестарам долю ў камерцыйнай структуры, звязанай з чэмпіянатам свету, стала сур’ёзным пралікам і прывяла да падрыву даверу ўнутры футбольнай супольнасці.