Супрацоўнікі Пружанскага РАУС выявілі падпольную вытворчасць спіртнога ў лесе. Падчас рэйду міліцыянеры выявілі самаробную ўстаноўку, на якой варылі брагу — канфіскавана больш за 9 тон вадкасці і 155 літраў самагонкі.
Як паведамілі ў праваахоўных органах, вытворчасцю займаўся 45-гадовы мясцовы жыхар. Ён заявіў, што рабіў алкаголь выключна для асабістага спажывання. Цяпер следчыя высвятляюць, ці адпавядае гэта рэчаіснасці.
«Апарат быў дэмантаваны і канфіскаваны, паўфабрыкаты знішчаны на месцы», — адзначылі ў РАУС. Па выніках экспертызы самаробнага алкаголю дзеянні мужчыны атрымаюць прававую адзнаку.
Па беларускім заканадаўстве за самавольны выраб алкаголю фізічнай асобай пагражае штраф да пяці базавых велічынь з канфіскацыяй прадукцыі і абсталявання. Пры паўторным парушэнні — да 30 базавых велічынь.
