Адказваючы на пытанне аб тым, ці трэба блакіраваць сацыяльныя сеткі, Уладзімір Пярцоў пазначыў сваю пазіцыю: «Па-першае, не блакіраваць сацыяльныя сеткі для дзяцей 15-16 гадоў, а ўводзіць узроставыя абмежаванні і іншыя цэнзы, якія ўжо заканадаўча прыняты ў тым ліку і ў суседніх краінах. З улікам таго, што сацсеткі ўсё больш пачынаюць уплываць на маладое пакаленне, якое са сталеннем не набывае вопыт чытання папяровых газет і застаецца верным сваім лічбавым пляцоўкам, праз якія нам дастаткова эфектыўна ўдаецца прасоўваць сваю праўду ў дачыненні да краіны. Дзяржаўныя адміністрацыі краін прымаюць меры, якія абмяжоўваюць сацсеткі для дзяцей да пэўнага ўзросту пад выглядам іх каварных алгарытмаў, псіхічнага ўздзеяння, дапускаючы парог уваходжання ўжо ў больш-менш свядомым узросце. Прымаць рэгуляцыйныя рашэнні ў дачыненні да абмежаванняў па ўзросце або нейкіх яшчэ параметрах мы пакуль не збіраемся», — падкрэсліў Уладзімір Пярцоў.

Такіх механізмаў абмежавання, паводле яго, пакуль у краіне няма. 

«Пакуль алгарытм пацвярджэння свайго ўзросту маладымі людзьмі досыць складаны. Няма гарантыі, які менавіта карыстальнік у дадзены момант уваходзіць пад тым ці іншым нікам у сацыяльную сетку. Пры гэтым мы ведаем, што праз гульнявыя платформы, сацсеткі намеры на нашу моладзь ужо ёсць. Гэтыя сацыяльныя сеткі пачынаюць збор персанальных даных, прымушаюць маладога чалавека, часцяком дзіця, прад’явіць скан ці фота свайго пашпарта ці іншага дакумента, каб усю лічбавую праўду пра гэтага персанажа сабраць разам у пэўным банку захоўвання для разумення, хто і пад якім нікам уваходзіць, якія рэсурсы наведвае, у што гуляе, што гугліць, перасылае. Мы гэта бачым, назіраем, пакуль робім толькі папярэднія высновы», — расказаў Уладзімір Пярцоў.

Лічбавы свет трансфармуецца, звярнуў увагу першы намеснік кіраўніка Адміністрацыі Прэзідэнта. «Бачым, што адбываецца з Telegram, TikTok, як згасаюць некаторыя звыклыя дамінуючыя сацыяльныя сеткі, як адбываюцца істотныя змены ў медыяландшафтах. Да чаго гэта прывядзе, як нам у гэта ўбудоўвацца, пакуль адкрытае пытанне для органаў рэгулятара», — дадаў ён.