Па выніках 2025 года аб’ём беларуска-расійскага гандлю перавысіў $50 млрд. «Расці ёсць куды, гэта не паталок», — упэўнены Юрый Селівёрстаў.

Ён звярнуў увагу, што структура беларуска-расійскага тавараабароту даволі збалансаваная. «Каля $27 млрд — наш экспарт і такі ж імпарт з Расійскай Федэрацыі. То-бок, па сутнасці, гэта дазваляе нам забяспечваць збалансаваны плацежны баланс, дзе няма перакосаў у які-небудзь бок. Але, вядома, ёсць куды расці», — сказаў пасол.

Рэзервы для росту дыпламат бачыць у сумесных праектах, якія яшчэ знаходзяцца ў стадыі рэалізацыі або толькі намечаны. У іх ліку — стварэнне самалёта «Асвей», розных зборачных вытворчасцяў, новых імпартазамяшчальных вузлоў і кампанентаў для машынабудавання і г. д. «Гэта вялікі пласт для развіцця», — канстатаваў ён.

Значны патэнцыял мае і сфера паслуг, у прыватнасці турызм. «І ў Расійскай Федэрацыі, і ў Рэспубліцы Беларусь пастаўлена задача па павелічэнні ўнёску турызму ў валавы ўнутраны прадукт. І гэта не толькі задача зарабіць грошы, але і задача, каб тыя нашы грамадзяне, якія наведваюць нашы краіны, маглі лепш адпачыць, падлячыцца, каб у іх было дзе камфортна спыніцца. А сёння па розных прычынах свае грошы грамадзяне вывозяць у іншыя краіны. Але гэта не значыць, што ім трэба забараніць туды выязджаць», — адзначыў Юрый Селівёрстаў.

«У нас вялікія рэзервы для тавараабароту. Я б, вядома, хацеў, каб ён падвоіўся. Калі б за 10 гадоў мы маглі дасягнуць $100 млрд, гэта было б наогул выдатна», — падкрэсліў пасол Беларусі ў РФ.