Па прагнозах на 2 лютага, тэмпература паветра ўначы і раніцай у некаторых раёнах краіны дасягне 31–33 градусаў марозу. 

Рашэнне аб прыпыненні заняткаў у школе прымаецца мясцовымі выканаўчымі і распарадчымі органамі ўлады ў выпадку, калі ў 7 гадзін раніцы будзе зафіксавана тэмпература паветра на адзнацы мінус 25 градусаў і ніжэй і хуткасць ветру больш за 3 м/с. У сувязі з гэтым мясцовыя органы кіравання адукацыяй загадзя даводзяць да бацькоў інфармацыю аб арганізацыі навучальных заняткаў і падвозе навучэнцаў.

У Дэпартаменце кантролю якасці адукацыі паведамілі, што не дапускаецца правядзенне навучальных заняткаў па фізічнай культуры, спартыўна-масавых і фізкультурна-аздараўляльных мерапрыемстваў з вучнямі на адкрытым паветры пры тэмпературы паветра ніжэй за 15 градусаў марозу і хуткасці руху паветра больш за 3 м/с.

У ведамстве таксама звярнулі ўвагу на тое, што кіраўнік установы адукацыі павінен абмяжоўваць працягласць прагулак або ўвогуле адмяняць іх для дзяцей у дрэннае надвор’е (напрыклад, мароз, пранізлівы вецер) і пры надзвычайных сітуацыях прыроднага і тэхнагеннага характару. Прагулкі таксама скарачаюцца або адмяняюцца пры ветры хутчэй за 3 м/с і 15 градусаў марозу і ніжэй для дзяцей да 3 гадоў, мінус 18 градусаў і ніжэй — для дзяцей 3–7 гадоў, і пры 22 градусах марозу і ніжэй — для школьнікаў ад сямі гадоў і старэй. Пры гэтым у час прагулкі павінны быць забяспечаны рухальная актыўнасць дзяцей, адзенне і абутак, якія адпавядаюць умовам надвор’я.

У Мінадукацыі заўважылі, што з улікам умоў надвор’я ў канкрэтнай мясцовасці, а таксама адлегласці, якую дзіцяці неабходна адолець да ўстановы адукацыі, бацькі таксама маюць права прыняць рашэнне адпраўляць ці не адпраўляць вучня ў школу. Пры гэтым яны абавязкова загадзя павінны праінфармаваць аб гэтым класнага кіраўніка (выхавальніка дзіцячага садка). У такім выпадку па месцы знаходжання дзяцей павінны быць забяспечаны максімальна бяспечныя ўмовы. Калі дзіця застаецца дома, то дадатковыя дакументы ва ўстанову адукацыі падаваць не спатрэбіцца.