Пляцоўка «Смак навукі» традыцыйна прысвечана тэхналогіям прыгатавання ежы і навуковаму боку гэтага працэсу.

Адной з самых цікавых актыўнасцяў стане «Дэгустаторый». Гэта лекторый, у якім можна будзе не толькі пачуць цікавую інфармацыю, але і пакаштаваць новыя веды на смак. У гэтым дапаможа дуэт з вучонага і шэф-кухара. Па словах арганізатараў, гэты фармат новы, паколькі раней госці за дэгустацыяй не паспявалі даведацца, што хаваецца за рэцэптурай.

Сёлета «Дэгустаторый» будзе прысвечаны тэматыцы бялку. На фестывалі прыгатуюць яго альтэрнатыўныя крыніцы, якія можна будзе прадэгуставаць, напрыклад, цвыркуноў. У НАН адзначаюць, што гэта не спроба замяніць мяса насякомымі, а здзівіць людзей і зацікавіць. Менавіта ў гэтай панэлі можна будзе пакаштаваць не толькі цвыркуноў: госці даведаюцца і пра раслінныя і насякомаедныя крыніцы бялку.

Прыгатуюць і соевае мяса, запэўніваюць, што наведвальнікі не змогуць адрозніць яго смак ад курынага з-за асаблівай рэцэптуры. Каманда арганізатараў гарантуе якасць смаку, бо гатаваць будзе гастраэксперт і пераможца папулярнага шоу «Бітва шэфаў». Па словах навукоўцаў, прыгатаванне такога прадукту патрабуе асаблівага падыходу. Трэба правільна падабраць спецыі і спосаб прыгатавання, каб падмануць рэцэптары чалавека: на выгляд страва можа быць не заўсёды апетытнай, але будзе вельмі прыемна пахнуць і яе захочацца пакаштаваць.

Шмат новага можна будзе даведацца і пра традыцыйную беларускую кухню. Стваральнікі засяродзіліся на стравах, якія менш звыклыя і прыйшлі да нас з іншых народаў. Кожную можна будзе пратэставаць. 

Наведвальніку таксама прапануюць навінкі Акадэміі навук, напрыклад, Інстытута мяса-малочнай прамысловасці — іх кісламалочныя безлактозныя прадукты. А яшчэ можна будзе даведацца аб рэцэптуры прыгатавання смаўжоў. Акрамя таго, на іх стэндзе прапануюць пакаштаваць закваскі. 

Школьнікі з Крычава дадуць прадэгуставаць незвычайныя стравы з бульбы, напрыклад, варэнне. Чакаюць гасцей і прадукты з чайнага грыба. Навукоўцы пакажуць новыя сарты беларускай бульбы з пігментаванай мякаццю: ружовай, фіялетавай і іншых колераў. 

У фармаце «Дэгустаторыя» будзе шэсць выступленняў кожны дзень. Таксама прадставяць пазнавальныя стэнды, напрыклад, аб новых распрацоўках з лубіну і незвычайных прадуктах з яго.