«Цягнік Памяці» прыбыў сёння ў Жлобін, перадае БелТА.

На пероне для гасцей падрыхтавалі цёплае музычнае прывітанне са словамі падзякі героям, якія заваявалі Вялікую Перамогу.

Удзельнік праекта Алег Арцёмкаў з Гомеля адзначыў, што для яго асаблівы гонар прысутнічаць на такім мерапрыемстве. Ён прызнаўся, што, аднойчы пачуўшы пра «Цягнік Памяці», вельмі натхніўся і марыў адправіцца па патрыятычным маршруце. «І вось я стаю сёння ў ліку ўдзельнікаў «Цягніка Памяці», — з гонарам сказаў малады чалавек.

• Паводле слоў Алега, яго прадзядуля Антон Леановіч Крывіцкі ваяваў у шэрагах Чырвонай арміі, быў узнагароджаны медалямі «За адвагу» і «За перамогу над Германіяй у Вялікай Айчыннай вайне 1941-1945 гг.». «У нашай сям’і шануюць яго подзвіг. І зараз я імкнуся знайсці ўсё больш інфармацыі аб прадзедзе, бо шмат дадзеных аб ім было страчана. Імкнуся па макулінках сабраць усё. Для мяне веданне гісторыі Вялікай Айчыннай вайны — важная рэч. Бо народ, не дасведчаны сваёй гісторыі, не мае будучыні. Мы разам сабраліся ў „Цягніку Памяці“, каб зберагчы гэтую гісторыю. Мы разам нясём яе будучым пакаленням. І разам мы — сіла», — перакананы Алег Арцёмкаў.

Падтрымаць удзельнікаў праекта прыехала і Дар’я Чугунова з Рагачова — яна была пасажырам «Цягніка Памяці» ў 2023 годзе. «Два гады прайшло, але гэты цудоўны праект успамінаю зноў і зноў. Кожны год сачу за падзеямі „Цягніка Памяці“. Падтрымліваю кантакты з хлопцамі з іншых краін, з якімі мы разам тады пабывалі ў Брэсцкай крэпасці, Валгаградзе, Туле і многіх іншых гарадах маршруту», — падзялілася дзяўчына.

• Яна прызналася: пасля ўдзелу ў праекце яшчэ больш усвядоміла, наколькі важна абараняць гістарычную праўду аб падзеях Вялікай Айчыннай вайны. «І гэта ў тым ліку доўг маладога пакалення. Бо некаторыя краіны зараз хочуць, стараюцца перапісаць гісторыю. А для нас гэта не проста гісторыя. Гэта памяць аб нашых продках, гэта сувязь нашых пакаленняў», — пераканана Дар’я.

Старшыня Жлобінскага райвыканкама Сяргей Ярэц, цёпла вітаючы ўдзельнікаў праекта, звярнуў увагу, што «Цягнік Памяці» зрабіў прыпынак у Жлобіне ў знамянальны для ўсяго раёна дзень — дзень вызвалення райцэнтра ад нямецка-фашысцкіх захопнікаў. «І сёння мы пакажам аб’екты, праз якія мы будзем несці праз стагоддзі памяць, якая нам дасталася ад нашых бацькоў, нашых продкаў. На жаль, з кожным годам усё менш і менш відавочцаў тых падзей. І я ўпэўнены, што і кожны з нас, і кожны ўдзельнік гэтага праекта захавае гістарычную праўду і перадасць яе наступным пакаленням», — сказаў ён.

Сенатар Расійскай Федэрацыі ад Архангельскай вобласці, член Камітэта Савета Федэрацыі па сацыяльнай палітыцы Іван Новікаў нагадаў радкі з вядомай паэмы Аляксандра Твардоўскага:

«Бераг левы, бераг правы,
Снег шурпаты, абза лёду...
Каму памяць, каму слава,
Каму цёмная вада, -
Ні прыкметы, ні следа».

«Апошні радок прысвечаны вялізнай колькасці нашых з вамі продкаў, якія да гэтага часу ляжаць у безназоўных магілах па ўсёй вялізнай тэрыторыі былых савецкіх рэспублік. У фашызму былі найстрашэнныя грымасы, пра якія трэба памятаць», — звярнуўся да юных удзельнікаў праекта Іван Новікаў.

Праект «Цягнік Памяці», ініцыяваны кіраўнікамі верхніх палат парламентаў Беларусі і Расіі, упершыню рэалізаваны ў 2022 годзе. У 2024 годзе ўдзельнікі праекта наведалі 13 гарадоў, пераадолеўшы больш як 9 тыс. км маршруту.