Гульні-2028 прыме Лос-Анджэлес, і аргкамітэт вырашыў увайсці ў гісторыю. Прычым, не будаўніцтвам нейкіх супераб’ектаў або рэкорднай колькасцю ўдзельнікаў, паведамляе «Мінская Праўда».
Горад будзе першым, які выкарыстае два стадыёны для цырымоніі адкрыцця летніх Гульняў. Такімі стануць спартыўны комплекс Мемарыяльны Калізей і стадыён SoFi у Інглвудзе. А цырымонія намечана на 14 ліпеня 2028 года. Акрамя таго, Мемарыяльны Калізей стане першым у свеце, дзе пройдуць тры летнія Алімпіяды (1932, 1984 і 2028).
— Комплексы для цырымоніі адкрыцця ў 2028 годзе падкрэсляць багатую спартыўную гісторыю Лос-Анджэлеса і перадавую будучыню, дэманструючы самае лепшае, што горад можа прапанаваць на сусветнай арэне, — растлумачыў старшыня і прэзідэнт аргкамітэта LA28 Кейсі Васэрман. — Гэтыя два незвычайныя аб’екты створаць незабыўныя ўражанні ў балельшчыкаў і ўдзельнікаў стартаў.
