Кіраўнік дзяржавы Аляксандр Лукашэнка 5 мая правёў нараду з кіраўніцтвам Савета Міністраў. У парадку дня былі фінансавыя пытанні, звязаныя з развіццём цэментнай галіны, Светлагорскага ЦКК і Аршанскага мясакансервавага камбіната разам з яго сыравіннай зонай пад кіраваннем агракамбіната «Дзяржынскі».

Так ці інакш усе пералічаныя пытанні былі звязаны з просьбамі ўрада аб падтрымцы, фінансавых паслабленнях і рэструктурызацыі запазычанасці. Прэзідэнт звярнуў увагу, што сам па сабе гэта няправільны падыход і яго насцярожвае такая тэндэнцыя.

«Я баюся, што ўрад можа ўзяць такі курс, калі не ўзяў. Вось абавязкова трэба там камусьці дапамагчы, спісаць... Можа, камусьці і трэба дапамагчы, калі гэта трэба дзяржаве. Вось каб у нас гэтага не здарылася, — запатрабаваў беларускі лідар. — Я разумею, што вы мне прапануеце, але я заўсёды арыентаваў: трэба прымушаць працаваць кіраўніка. Прыйшоў — рабі».

Па выніках нарады журналісты пацікавіліся ў Аляксандра Турчына, ці не азначаюць такія падыходы, што «ўрад занадта добры».

«Урад дакладна не добры. Урад стараецца быць аб’ектыўным. Мы ўносім на разгляд Прэзідэнту такія прапановы, калі мы перакананы, што ніякіх іншых варыянтаў, акрамя як рэалізацыі такіх мерапрыемстваў, няма», — адзначыў Аляксандр Турчын.

Гаворачы аб тэматыцы праведзенай нарады, прэм’ер-міністр растлумачыў, што ўнесеныя на разгляд кіраўніка дзяржавы дакументы не прадугледжвалі дадатковага выдзялення сродкаў. «Свет імкліва мяняецца. Узнікаюць такія сітуацыі, якія патрабуюць аператыўнага ўмяшання і рэагавання. Для ўрада галоўная задача — эфектыўная работа эканомікі. А работа эканомікі ў тым ліку складаецца з работы прадпрыемстваў», — заявіў кіраўнік урада.