«Ключавыя вектары інтэграцыі Беларусі і Расіі традыцыйна задаюць кіраўнікі дзяржаў. Агульнасць іх поглядаў і падыходаў да вырашэння праблемных пытанняў на фоне няпростых знешніх абставін дазваляе хутка рэалізоўваць агульныя планы на ўсіх узроўнях узаемадзеяння — ад урада да рэгіёна і прадпрыемства. За апошнія гады Беларусь і Расія даказалі, што Саюзная дзяржава — гэта не дэкларацыя, а рабочы механізм, які дае рэальныя вынікі ў гандлі, прамысловасці, тэхналогіях і сацыяльнай сферы», — сказаў Аляксандр Турчын.

Прэм’ер-міністр падкрэсліў, што беларуская і расійская эканомікі пераплеценыя як ніколі раней. «Падстаўляем плячо адзін аднаму ў рамках прамысловай кааперацыі, разам вырашаем пытанні тэхналагічнага развіцця, забяспечваем насычэнне рынку харчовымі і спажывецкімі таварамі. Нягледзячы на ціск, які працягваецца, эканомікі Беларусі і Расіі дэманструюць станоўчую траекторыю росту. У такой устойлівасці ёсць заслуга і нашай цеснай інтэграцыі. У бягучым годзе ўзаемны гандаль працягвае ўстанаўліваць рэкорды. За восем месяцаў гэтага года тавараабарот Беларусі і Расіі павялічыўся больш як на 20 працэнтаў. Асабліва характэрна тая акалічнасць, што мы дасягнулі практычна поўнай збалансаванасці ў дынаміцы ўзаемных паставак. Высокімі тэмпамі расце ўзаемны гандаль паслугамі, традыцыйныя флагманы тут — транспарт, будаўніцтва, дзелавыя і камп’ютарныя паслугі», — пазначыў Прэм’ер-міністр.

Як адзначыў Аляксандр Турчын, у першыя дні кастрычніка беларуская сталіца выступае як інтэграцыйная пляцоўка, прымае прадстаўнічыя дэлегацыі краін ЕАЭС і ўдзельнікаў выставы «ІНАПРАМ. Беларусь». Сёння на пасяджэнні Савета Міністраў Саюзнай дзяржавы трэба будзе прыняць рашэнне па шырокім коле пытанняў, якія ўваходзяць у кампетэнцыю ўрадаў і адпрацаваць тэмы, якія выносяцца на разгляд Вышэйшага дзяржсавета Саюзнай дзяржавы.