Адкрываючы пасяджэнне, Прэм’ер-міністр Аляксандр Турчын акцэнтаваў увагу на разглядзе ключавых праграмных дакументаў на наступную пяцігодку:

— Праекты дакументаў былі распрацаваны ў адпаведнасці з перадвыбарнай праграмай Кіраўніка нашай дзяржавы, даручэннямі, дадзенымі пры прызначэнні новага складу ўрада, у інаўгурацыйнай прамове. 

Гаворачы аб навацыях дакументаў, кіраўнік Саўміна адзначыў:

— Упершыню ў Праграме ёсць адлічбаваныя паказчыкі, якія мы павінны дасягнуць і кантраляваць. Упершыню Праграма забяспечана рэсурснай падтрымкай эканомікі. Упершыню праведзена маштабнае сацыялагічнае даследаванне. 

Наступны крок за разглядам у Саўміне, нагадаў ён, выходзіць з Праграмай дзеяння ўрада ў Парламент і накіраваць канцэпцыю Праграмы сацыяльна-эканамічнага развіцця для адабрэння Кіраўніком дзяржавы. 

Каментуючы гэтыя дакументы журналістам, міністр эканомікі Юрый Чабатар адзначыў, што пры іх падрыхтоўцы акцэнт рабіўся на даручэннях Прэзідэнта, дадзеных у яго перадвыбарнай праграме, а таксама інаўгурацыйнай прамове. Акрамя таго, за аснову таксама браліся запыты насельніцтва, якія былі атрыманы на аснове праведзенага сацыялагічнага даследавання. А таксама доўгатэрміновыя дакументы, такія як Нацыянальная стратэгія ўстойлівага развіцця:

— Пры прызначэнні эканамічнага блока Прэзідэнт даў даручэнне зрабіць дакумент (Праграму сацыяльна—эканамічнага развіцця на пяцігодку — заўв.аўт.) абноўленым, зусім новы вобраз. Таму мы падышлі такім чынам, што ў пяцігодцы вылучылі асноўныя напрамкі. Мы сабралі блокі, якія будуць працаваць на асноўныя выклікі. 

Юрый Чабатар растлумачыў, пра якія кірункі ідзе гаворка.

— Камфортныя ўмовы пражывання. На гэта будуць працаваць транспарт, жыллё, абслугоўванне і гэтак далей. Развіццё чалавечага патэнцыялу. На гэта будуць працаваць адукацыя, медыцына і гэтак далей. 

Міністр эканомікі дадаў, што ў сувязі з гэтым у дакуменце вылучаныя 5 прыярытэтаў сацыяльна-эканамічнага развіцця:

— У першую чаргу гэта арэнднае жыллё (планка па будаўніцтве арэнднага жылля вырасце ў некалькі разоў). Далей — моцныя рэгіёны, тут бачым развіццё як сацыяльнай інфраструктуры, так і рэалізацыю камерцыйных праектаў, працягваем усе ініцыятывы ў гэтым плане. Наступны напрамак — лічбавізацыя і тэхналогіі (зразумела, тут трэба адказваць на выклікі сучаснасці і павышаць канкурэнтаздольнасць нашай прамысловасці і рэальнага сектара эканомікі). Турызм — гэта наш прыярытэт і задача вырасці ў гэтай галіне крыху больш чым 4% у ВУП. 

Закранаючы канкрэтныя параметры развіцця эканомікі, Юрый Чабатар адзначыў, што эканамічным ведамствам былі пралічылі некалькі сцэнарыяў:

— У нас было тры варыянты, мы вызначыліся на мэтавым: у ім мы ставім задачу вырасці па валавым унутраным прадукце каля 116%, апераджальнымі тэмпамі будуць расці даходы насельніцтва і інвестыцыі, а таксама наш экспартны патэнцыял. Гэта асноўныя верхнія ўзроўні, далей яны ўжо будуць «расшывацца», калі мы пачнем рабіць Праграму сацыяльна-эканамічнага развіцця. 

Ацэньваючы сцэнар развіцця эканомікі на пяцігодку, Юрый Чабатар назваў яго амбіцыйным, але рэальным:

— Мы зыходзім з таго, каб задачы (пастаўленыя Прэзідэнтам — заўв.аўт.) выконваць, нам патрэбныя адпаведныя крыніцы. Для гэтага ў нас ёсць рэзервы. 

Са свайго боку дырэктар Беларускага інстытута стратэгічных даследаванняў Алег Макараў распавёў журналістам, што для падрыхтоўкі ключавых дакументаў, якія разглядаліся падчас пасяджэння Саўміна, быў праведзены цэлы комплекс даследаванняў:

— Быў задзейнічаны цэлы шэраг сацыялагічных службаў і методык сацыялагічнага даследавання (онлайн-апытанні, даследаванні ў рэале, платформа «Народная пяцігодка», якая дазваляе даць не толькі адказы на пытанні, але і прапановы). 

Што паказалі сацдаследаванні? 

— Па-першае, уцягнутасць (гэта значыць цікавасць людзей і задаволенасць тым, што ў іх пытаюцца), — адзначыў Алег Макараў. — Гэта вельмі важна. Традыцыя пачалася з Канстытуцыйнай рэформы, рэферэндуму, дыялогавых пляцовак, і цяпер гэтая традыцыя працягваецца, гэта вельмі добра, сацыялагічны эфект ад сінэргіі найлепшы. 

Дырэктар БІСД растлумачыў, сацыялогія не адказвае на прамое пытанне «чаго людзі хочуць?». 

— Людзі хочуць шчасця. Яно не вымяраецца ў доларавым эквіваленце, а складаецца з цэлага шэрагу пазіцый. У той жа час нашы грамадзяне прагматычныя і хочуць павышэння дабрабыту, добрай інфраструктуры, развіцця прамысловасці, паляпшэння кіравання ў дзяржаве, зніжэння дэбюракратызацыі, развіцця новых галін, звязаных з інавацыямі. Хочуць міру, стабільнасці, каб краіна развівалася, захоўваючы традыцыі. Усе гэтыя пазіцыі закладзены ў Праграму сацыяльна-эканамічнага развіцця, у яе прыярытэты і напрамкі. Дакумент комплексны, у ім усе гэтыя пазіцыі адлюстраваныя, — растлумачыў Алег Макараў.

Што тычыцца прамых чаканняў грамадзян, адлюстраваных у сацыялогіі, дырэктар БІСД канстатаваў:

— Яны звязаны з такой каштоўнаснай сістэмай, як жыллё, сям’я, праца, запатрабаванасць (гэта значыць павышэнне кваліфікацыі, адукацыі), здароўе (даступнасць і якасць аховы здароўя). Працягласць жыцця, якасць жыцця бацькоў (таму што ў каштоўнаснай матрыцы беларуса, не толькі я, але і сям’я, дзеці, бацькі, іх бяспека і будучыня). Усё, што звязана з дзяцінствам, сталым узростам, пенсійным забеспячэннем — усё гэта ўваходзіць у каштоўнасную матрыцу нашых грамадзян. 

Адказваючы на пытанне, колькі было апытаных падчас сацдаследавання Алег Макараў растлумачыў:

— У рамках апытання face-to-face — паўтары тысячы, а ў рамках электроннай платформы — трыццаць тысяч чалавек. І трэба сказаць, гэта вялікая праца, таму што сам апытальнік быў досыць вялікі, і трыццаць тысяч — тыя, хто дайшлі да фіналу і прайшлі цалкам увесь апытанне.