Па даных ведамства, сёлета ў краіне намецілася станоўчая тэндэнцыя: упершыню за апошнія гады ўзровень кіберзлачыннасці пайшоў на спад. За студзень — кастрычнік колькасць такіх злачынстваў знізілася на 9%. Пры гэтым праваахоўнікі адзначаюць, што новыя лічбавыя пагрозы працягваюць эвалюцыянаваць, таму грамадзянам не трэба страчваць пільнасць.

«Нягледзячы на абнадзейваючае зніжэнне, доля кіберзлачынстваў складае амаль трэць у агульным масіве зарэгістраваных злачынстваў, пры гэтым зламыснікі не спыняюць пошук новых уразлівасцей і спосабаў узбагачэння», — растлумачылі ў МУС.

Для абароны грамадзян у лічбавай прасторы з 24 па 30 лістапада ў краіне пройдзе рэспубліканская прафілактычная акцыя «Тыдзень кібербяспекі». Яна накіравана на павышэнне дасведчанасці насельніцтва аб новых схемах махлярства і фарміраванне культуры бяспечных паводзін у інтэрнэце.

Паводле слоў намесніка начальніка ГУПК МУС Аляксандра Рынгевіча, асаблівая ўвага будзе ўдзелена процідзеянню тэлефоннаму і анлайн-махлярству, а таксама прафілактыцы ўключэння грамадзян, асабліва моладзі, у незаконныя схемы па пераводу ў наяўныя грашовыя сродкі. У цэнтры ўвагі таксама абарона найбольш уразлівых катэгорый — пенсіянераў і непаўналетніх.

МУС запрашае грамадзян далучыцца да праграмы акцыі. Гэта дазволіць павысіць лічбавую пісьменнасць і надзейна абараніць зберажэнні ад кіберпагроз.