«Праз Афганістан прайшлі звыш 30 тысяч беларусаў, ёсць і сярод нас такія людзі, — звяртаючыся да гасцей міліцэйскай ВНУ, адзначыў першы намеснік начальніка Акадэміі МУС Аляксей БАШАН. — Вы працавалі ва ўстанове вышэйшай адукацыі і працягваеце выхоўваць маладое пакаленне ў традыцыях павагі да ветэранаў і іх гераічнага мінулага. Моладзь абавязана ведаць аб афганскай вайне, а мы не павінны дапусціць яе забыцця. Ваша шматгадовая і добрасумленная праца, адданасць справе і самаахвярнае служэнне Айчыне — прыклад для пачынаючых супрацоўнікаў міліцыі і для ўсіх нас!»

Ветэраны акадэміі палкоўнікі міліцыі ў адстаўцы Аляксандр Аляксеевіч Андрыянаў, Васіль Іванавіч Стэльмах, Уладзімір Уладзіміравіч Дук, Аляксандр Паўлавіч Місцюкевіч, Аляксей Іванавіч Бародзіч, падпалкоўнік міліцыі ў адстаўцы Мікалай Ярашэвіч, маёр міліцыі ў адстаўцы Алег Вараб’ёў за актыўную папулярызацыю дзейнасці органаў унутраных спраў і вялікі ўклад у выхаванне асабовага складу ўзнагароджаны нагрудным знакам адрознення «За службу» Акадэміі МУС і памятнымі падарункамі.

Напярэдадні Дня памяці воінаў-інтэрнацыяналістаў старшыня першаснай прафсаюзнай арганізацыі акадэміі Уладзіслаў Трыкоза і прафесар кафедры канстытуцыйнага права воін-інтэрнацыяналіст Аляксей Бародзіч наведалі Храм Усіх Святых і яго крыпту. Мерапрыемства прайшло сумесна з аб’яднанай прафсаюзнай арганізацыяй. Прысутныя аддалі даніну павагі тым, хто выконваў свой інтэрнацыянальны абавязак.

Курсанты наведалі ўдаву воіна-інтэрнацыяналіста Тамару Якаўлеву. Гэта была кранальная сустрэча, хлопцы правялі час за гарбатай, слухаючы гісторыі пра гераізм і мужнасць, якія разгортваліся на афганскай зямлі. Акрамя таго, курсанты — пастаянныя госці гарадскіх і раённых мерапрыемстваў, якія праводзяцца напярэдадні 36-й гадавіны вываду савецкіх войскаў з Афганістана.

Фота прэс-службы Акадэміі МУС