— Нашымі супрацоўнікамі падрыхтавана навукова-папулярнае выданне «Васілёк сіні. Расліна года Беларусі», — праінфармавалі ў Інстытуце. — Аўтарамі з’яўляюцца кіраўнік лабараторыі флоры і сістэматыкі раслін Сяргей Саўчук і навуковы супрацоўнік гэтай лабараторыі Уладзімір Лябедзька. 

Кніга прызначана для сярэдняга школьнага ўзросту. У выданні распавядаецца пра тое, як выглядае васілёк, дзе расце, пра ўжыванне яго насельніцтвам, а таксама сімвалам якіх брэндаў з’яўляецца васілёк сіні, якія з ім звязаны легенды і павер’і і інш.

Нацыянальная кампанія «Расліна года» праводзіцца грамадскай арганізацыяй «Батанічнае таварыства» штогод для прыцягнення ўвагі да дзікарослых раслін Беларусі, іх праблем і неабходнасці захавання. Тытул «Расліна 2025 года» васілёк атрымаў мінулай восенню. Пераможца выбралі большасцю галасоў праз анлайн-галасаванне. Канкурэнцыю васільку склалі чабор звычайны і верас звычайны. 

Прыняць удзел у апытанні мог любы жадаючы.

Васілёк сіні — аднагадовая, часам двухгадовая расліна сямейства астравых вышынёй 30-70 см. Сцябло прамастаячае, у верхняй частцы галінастае. Корань стрыжневы, добра развіты. Квітнее з чэрвеня да позняй восені. Кветкі блакітныя, сінія, радзей блакітныя ці белыя. Суквецці — адзінкавыя кошыкі, размешчаныя на бязлісцевых частках сцеблаў. Плады спеюць у жніўні. Сустракаецца васілёк уздоўж дарог, па абочынах палёў, у лесапалос. Размнажаецца насеннем. Лекавай сыравінай служаць распусціўшыяся сінія краявыя кветкі, якія змяшчаюць антоціаны і кумарыны. У народнай медыцыне настой кветак выкарыстоўваюць як мачагонны патагонны і жаўцягонны сродак пры цыстытах і нефрытах, а таксама для паляпшэння стрававання. Ён аказвае супрацьзапаленчае і антымікробнае дзеянне, здымае спазм гладкай мускулатуры ўнутраных органаў, карысны пры лячэнні парушэнняў змрочнага гледжання (курыная слепата). Настой ўжываюць таксама як гарачкапаніжальны сродак пры ВРЗ і звязаных з гэтым галаўных болях.