У яго аснове — навучанне непаўналетніх дарожнай культуры, бяспечнай мабільнасці і тэхнічным відам спорту:

«Гэта наша інвестыцыя ў будучыню, у бяспеку нашых дзяцей. Мы хочам паказаць, што ДТСААФ — гэта не толькі спорт, але і адказныя адносіны да дарожнай культуры», — падкрэсліла першы намеснік дырэктара навучальна-спартыўнай установы «Спецыялізаваная дзіцяча-юнацкая спартыўна-тэхнічная школа па аўтамотаспорце» Рэспубліканскага дзяржаўна-грамадскага аб’яднання «Добраахвотнае таварыства садзейнічання арміі, авіяцыі і флоту Рэспублікі Беларусь» (ДТСААФ) Марыя Кушнер.

Паводле яе слоў, усё часцей непаўналетнія актыўна выкарыстоўваюць сродкі мабільнасці, навучаць карыстацца якімі найбольш эфектыўна менавіта на практыцы. Прычым пачынаць такое навучанне варта з самага ранняга ўзросту. У гэтым і заключаецца галоўная мэта фестывалю: «Мы даём кожнаму дзіцяці руль, трасу, знакі, экіпіроўку і, адпаведна, трэнера. І гэта, як нам падаецца, вельмі важна. Гэта прынцыпова новы падыход», — расказала Марыя Кушнер.

Праграма ахоплівае восем напрамкаў: ад першага дзіцячага транспарту да прафесійнага тэхнічнага спорту. Для самых маленькіх — бегавелы, педальныя міні-аўтамабілі і дзіцячы аўтагарадок. Для старэйшых дзяцей — веласіпедная школа з навучаннем тармажэння, сігналам рукой. Таксама падлеткаў і іх бацькоў навучаць бяспечнаму карыстанню электрасамакатамі і монаколамі. «Мы аб’ядноўваем намаганні многіх арганізацый, каб стварыць па-сапраўднаму эфектыўную прафілактычную пляцоўку. Гэта не разавая акцыя, а сістэмная работа ўсіх ведамстваў», — падкрэсліла Марыя Кушнер.

Раней такі фестываль у Беларусі не праводзіўся. Але арганізатары ўпэўнены: ён стане добрай традыцыяй і важным крокам у фарміраванні дарожнай культуры ў маладога пакалення.