Навукоўцы Дзяржаўнага ўніверсітэта асветы (ДУА, РФ) зафіксавалі распаўсюджванне ў Беларусі і Расіі віду камароў, які з’яўляецца асноўным у Еўропе пераносчыкам асабліва небяспечнай трапічнай малярыі.

У НПЦ НАН удакладнілі, што на тэрыторыі Беларусі першае выяўленне гэтага віду адбылося ў 1970-х гадах. «Дупляны камар на тэрыторыі Беларусі сустракаецца даволі рэдка. За апошнія сто гадоў гэты від рэгістраваўся ўсяго некалькі разоў, на тэрыторыі Брэсцкай і Гомельскай абласцей. Мною і маімі калегамі гэты від камара быў знойдзены толькі ў Магілёве», — адзначылі спецыялісты.

У НПЦ па біярэсурсах растлумачылі, што назва «дупляны» звязаная з характэрнай асаблівасцю віду: самкі адкладаюць яйкі ў дуплах дрэў, запоўненых дажджавой вадой. Лацінская назва — Anopheles plumbeus.

Акрамя таго, спецыялісты пракаменціравалі інфармацыю пра напады на людзей у Беларусі: «Усяго на тэрыторыі Беларусі зарэгістравана восем відаў малярыйных камароў. Пры гэтым большасць з іх у якасці асноўнай крыніцы крыві выбіраюць перш за ўсё буйную рагатую жывёлу. Anopheles plumbeus, наадварот, характарызуецца параўнальна высокай ступенню антрапафільнасці, г. зн. аддае перавагу харчаванню крывёю чалавека, што важна для ацэнкі эпідэмічнай значнасці гэтага віду як патэнцыйнага пераносчыка ўзбуджальнікаў трансмісіўных захворванняў», — расказалі ў НПЦ.

Спецыялісты паведамілі, што ў апошні час на тэрыторыі Еўропы і еўрапейскай часткі Расіі адбываецца экалагічная трансфармацыя віду. «У межах сумесных расійска-беларускіх даследаванняў намі было ўстаноўлена пашырэнне экалагічнай нішы дуплянага камара. Нароўні з характэрнымі для гэтага віду месцамі выпладу, прадстаўленымі дупламі дрэў, лічынкі былі выяўленыя ў аўтамабільнай пакрышцы, запоўненай дажджавой вадой, кінутай у гарадскім парку Магілёва», — патлумачылі ў НПЦ НАН Беларусі па біярэсурсах.

Спецыялісты звярнулі ўвагу на тое, што, нягледзячы на адносную рэдкасць гэтага віду, выяўленая антрапафільнасць камара ў спалучэнні са здольнасцю развівацца ў штучных месцах выпладу, размешчаных на ўрбанізаваных тэрыторыях, ствараюць перадумовы для частага кантакту гэтага віду камара з чалавекам. Акрамя таго, устаноўленая высокая ўспрымальнасць гэтага віду да ўзбуджальніка трапічнай малярыі — самай небяспечнай яе формы.

«На тэрыторыі Беларусі штогод рэгіструецца каля 10 выпадкаў завознай малярыі. Акрамя гемапаразітаў, Anopheles plumbeus з’яўляецца пераносчыкам арбавірусаў, у прыватнасці віруса ліхаманкі Заходняга Ніла. Таксама ва ўсходняй Аўстрыі зарэгістраваныя выпадкі трансмісіі гэтым відам узбуджальнікаў дырафілярыёзу. У Бельгіі Anopheles plumbeus з’яўляецца эксперыментальным пераносчыкам віруса японскага энцэфаліту», — падкрэслілі ў НПЦ.

Усё вышэйсказанае вызначае яго патэнцыйна высокую эпідэміялагічную значнасць для тэрыторыі Беларусі, заключылі ў НПЦ НАН Беларусі па біярэсурсах.