Па словах Ігара Сергяенкі, месца для семінара выбрана невыпадкова — гэта ўнікальны для сталіцы аб’ект, які многія беларусы выбіраюць для заключэння шлюбу. У верасні мінулага года рэканструяваны гісторыка-культурны комплекс «Лошыцкі» наведаў кіраўнік дзяржавы. «Аляксандр Лукашэнка неаднаразова падкрэсліваў, што сапраўдная моцная сям’я — працяг не толькі чыйго прозвішча, але і ўсяго беларускага народа. Культ паўнавартаснай сям’і з двума і больш дзецьмі павінен стаць стылем жыцця. Як адзначыў Прэзідэнт учора на нарадзе з кіраўніцтвам Савета Міністраў, мацярынства і бацькоўства павінны стаць модным трэндам. Формула простая: двое бацькоў — двое дзетак. Толькі так мы можам быць упэўнены, што наступныя пакаленні будуць працягнутыя, а значыць, будуць моцна трымаць суверэнітэт у сваіх руках і гарантавана жыць у міры», — падкрэсліў ён.

Кодэкс аб шлюбе і сям’і наўпрост не ўплывае на павышэнне нараджальнасці і вырашэнне дэмаграфічных пытанняў, аднак ён стварае гарантыі абароны правоў кожнага члена сям’і, робіць шлюб і сям’ю больш стабільнымі і прывабнымі для нараджэння дзяцей, звярнуў увагу Ігар Сергяенка. «Абарона і ўмацаванне інстытута сям’і і шлюбу, згодна з Канстытуцыяй нашай краіны, з’яўляецца прыярытэтам дзяржаўнай палітыкі, і яе эфектыўная рэалізацыя немагчымая без належнага прававога рэгулявання. Некалькі гадоў таму мы прынялі закон, які прадугледжвае карэкціроўку асобных палажэнняў Кодэкса аб шлюбе і сям’і. Змены закранулі шырокі спектр пытанняў, насілі кропкавы характар: ад маёмасных інтарэсаў непаўналетніх да рэгістрацыі актаў грамадзянскага стану. Але сёння наспела неабходнасць комплекснага ўдасканалення кодэкса як з улікам напрацаванай правапрымяняльнай практыкі, так і тэхналогій, якія развіваюцца», — растлумачыў Ігар Сергяенка.

 

У Палату прадстаўнікоў паступаюць прапановы ад Вярхоўнага Суда, Міністэрства юстыцыі і Мінскага гарвыканкама з абгрунтаваннем неабходнасці цэлага шэрагу змяненняў у кодэксе, дадаў спікер. «Гэтыя прапановы знаходзяць падтрымку і ў дэпутацкай супольнасці. Пастаянная камісія па ахове здароўя, фізічнай культуры, сямейнай і маладзёжнай палітыцы гатова ў цесным узаемадзеянні з усімі гэтымі структурамі аператыўна распрацаваць праект закона па карэкціроўцы Кодэкса аб шлюбе і сям’і, — сказаў ён. — Упэўнены, наша сённяшняя сустрэча дазволіць абмеркаваць надзённыя пытанні, якія знойдуць адлюстраванне ў згаданым праекце закона, бо няма нічога лепш, чым стабільнае заканадаўства ў такой важнай сферы».

Старшыня Мінгарвыканкама Уладзімір Кухараў падкрэсліў, што мерапрыемства дазволіць больш глыбока зірнуць на актуальныя пытанні ў шлюбна-сямейных адносінах і прапанаваныя шляхі іх вырашэння, што ў далейшым натуральным чынам перарасце ў прыняцце адпаведных нарматыўных прававых актаў.