Пакупніком выступіў буйны айчынны вытворца мясных вырабаў, а прадаўцом — сельскагаспадарчае прадпрыемства з Брэсцкай вобласці. Пашырэнне асартыменту мяса і мясапрадуктаў, што рэалізуюцца праз БУТБ, стала чарговым крокам па развіцці гэтага важнага сегмента біржавога таварнага рынку, на долю якога прыпала звыш 16% усяго аб’ёму біржавых продажаў сельгаспрадукцыі ў бягучым годзе.

«Мяса буйной рагатай жывёлы і птушкі, мясныя субпрадукты і паўфабрыкаты запатрабаваны як унутры краіны, так і за мяжой, аб чым наглядна сведчаць статыстычныя даныя. Так, па выніках 8 месяцаў 2026 года экспарт мясапрадуктаў праз біржу вырас на 7%, да $197,4 млн. Асноўнымі пакупнікамі былі кампаніі з Азербайджана, Кітая, Кыргызстана, Расіі і Узбекістана. Пры гэтым асабліва дынамічна развіваўся кітайскі напрамак. Пастаўкі ў Паднябесную павялічыліся ў 2,2 раза ў вартасным выражэнні. У той жа час на ўнутраным рынку аб’ёмы продажаў засталіся на ўзроўні мінулага года, але кола пастаянных пакупнікоў пашырылася са 146 да 164, а прадаўцоў — са 112 да 119», — расказалі ў прэс-службе таварнай біржы.

Штотыднёва на БУТБ праводзяцца тры гандлёвыя сесіі па рэалізацыі мясной прадукцыі на ўнутраным рынку і столькі ж на знешнім. У структуры здзелак пераважае ахалоджанае і замарожанае мяса буйной рагатай жывёлы.

ААТ «Беларуская ўніверсальная таварная біржа» створана ў 2004 годзе. Першыя таргі адбыліся ў чэрвені 2005 года. БУТБ — адна з буйнейшых таварных біржаў ва Усходняй Еўропе. Яе галоўная функцыя — садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.