Дакумент накіраваны на павышэнне эфектыўнасці мер па забеспячэнні грамадскага парадку і бяспекі ў месцах масавага знаходжання грамадзян, у тым ліку пры правядзенні культурных, спартыўных і іншых відовішчных мерапрыемстваў.

Указам, у прыватнасці, вызначаны пералік аб’ектаў, якія падлягаюць абсталяванню ручнымі сістэмамі трывожнай сігналізацыі, прыём сігналаў якіх ажыццяўляецца Дэпартаментам аховы МУС. У яго ўключаны аэрапорты, аўтобусныя і чыгуначныя вакзалы, установы адукацыі, гандлёвыя цэнтры, рынкі, аквапаркі, шматфункцыянальныя будынкі, а таксама спартыўна-відовішныя збудаванні, аб’екты культурнай інфраструктуры, установы аховы здароўя і дзяржаўныя ўстановы сацыяльнага абслугоўвання з колькасцю пасадачных і ложка-месцаў ад 300 і больш, іншыя крытычна важныя аб’екты.

Зменены пералік арганізацый, у якіх дапускаюцца асабісты надгляд рэчаў і дакументаў, транспартных сродкаў. Ён дапоўнены суб’ектамі, якія арганізуюць на пастаяннай аснове правядзенне дыскатэк, работу культурна-забаўляльных (начных) клубаў і маюць падраздзяленні аховы.

У пералік арганізацый, дзе дапускаецца надгляд рэчаў і дакументаў, транспартных сродкаў ведамаснымі работнікамі аховы, уключаны суб’екты гандлю (юрыдычныя асобы), ва ўласнасці або аператыўным кіраванні якіх знаходзяцца фізкультурна-спартыўныя збудаванні, гандлёвыя цэнтры і аб’екты культурнай інфраструктуры.

Акрамя таго, указам вызначаецца парадак выдачы і прыёму зброі і боепрыпасаў работнікам службы інкасацыі.