У Беларусі патэнцыял прыросту экспарту ацэньваецца ў $5,07 млрд. Такія даныя ўтрымліваюцца ў даследаванні Еўразійскага банка развіцця аб патэнцыяле прамысловасці ў краінах ЕАЭС. Ключавыя высновы прадстаўлены падчас вэбінару ад ЕАБР «Патэнцыял развіцця прамысловасці высокіх перадзелаў у Еўразійскім рэгіёне», паведамляе БелТА.
Дадатковае павелічэнне можа скласці 16 %, а агульны эканамічны эфект — $19,73 млрд.
У топ-10 таварных груп з найбольшым экспартным патэнцыялам увайшлі аўтамабілі, машыны і абсталяванне, Хімічная прадукцыя, харчовыя прадукты, металы, адзенне, камп'ютары, фармацэўтычная прадукцыя, электрычнае абсталяванне, гумовыя і пластмасавыя вырабы.
Беларусь у свеце займае 33-е месца па індэксе эканамічнай складанасці (паказчык, які адлюстроўвае ўзровень складанасці і дыверсіфікацыі вытворчых магчымасцяў краіны на аснове аналізу яе экспарту). Доля апрацоўчай прамысловасці ў ВУП складае 20,3 % (або $15,4 млрд), сярэдніх і высокіх перадзелаў у апрацоўчай прамысловасці — 19,8 %.
«Беларусь знаходзіцца ў топах па ўзроўні эканамічнай складанасці — адна з самых складаных з прамысловага пункту гледжання эканомік у нашым рэгіёне, згодна з міжнародным індэксам. Трэба далей развівацца. Там, дзе ёсць канкурэнтныя перавагі, можна знайсці рэзервы для экспарту, імпартазамяшчэння», — адзначыў кіраўнік Цэнтра галіновага аналізу дырэкцыі па аналітычнай рабоце Еўразійскага банка развіцця Арман Ахунбаеў.
Прамысловасць Еўразійскага рэгіёна (у які ўваходзяць Арменія, Беларусь, Казахстан, Кыргызстан, Расія, Таджыкістан, Узбекістан) уяўляе сабой найбуйнейшы сектар эканомікі, фарміруючы каля 31 % сукупнага ВУП. Унутры гэтага сектара ключавая роля належыць апрацоўчай прамысловасці, якая генерыруе 44,2 % валавой дабаўленай вартасці прамысловасці.
