Мэтай пасяджэння было абмеркаванне пытанняў практыкі прымянення заканадаўства аб навуковай, навукова-тэхнічнай і інавацыйнай дзейнасці, выяўленне вузкіх месцаў прававога рэгулявання адносін у сферы навукі, вызначэнне перспектыў развіцця заканадаўства ў гэтай сферы.
«Патрабаванне кіраўніка дзяржавы — навука павінна быць больш аператыўнай, мець больш цесную сувязь з рэальным сектарам эканомікі, своечасова і адэкватна рэагаваць на выклікі часу. Усе мы працуем у прававым полі — гэта і законы „Аб навуковай дзейнасці“, „Аб Нацыянальнай акадэміі навук Беларусі“, і ўказы. Наша задача — аператыўна ўносіць тыя змены ў заканадаўства, якія дазволяць навуцы працаваць больш эфектыўна», — сказаў старшыня Прэзідыума Нацыянальнай акадэміі навук Уладзімір Каранік і падкрэсліў, што для далейшага развіцця айчыннай навукі вельмі важны абмен думкамі з дэпутацкім корпусам.
На яго думку, частка палажэнняў закона «Аб Нацыянальнай акадэміі навук Беларусі» патрабуе перагляду, каб не было супярэчнасцяў з іншымі нарматыўнымі прававымі актамі. «Сёння мы на экспертным узроўні павінны вызначыцца, ці трэба такая колькасць законаў альбо можна аб’яднаць іх у адзін закон, які будзе асновай развіцця айчыннай навукі. А аператыўныя пытанні можна вырашаць праз нарматыўныя прававыя акты альбо ўзроўню кіраўніка дзяржавы, альбо ўзроўню ўрада. Гэта, з аднаго боку, захавае трывалы падмурак нашай навукі, а з другога боку, дазволіць аператыўна прымаць рашэнні, як таго патрабуе наш час», — адзначыў старшыня Прэзідыума НАН.
- Старшыня Пастаяннай камісіі па адукацыі, культуры і навуцы Палаты прадстаўнікоў Ігар Марзалюк дадаў, што на сёння створана нядрэнная заканадаўчая база, але новыя выклікі патрабуюць новых рашэнняў. «Таму сёння мы прыехалі ў НАН, каб прагаварыць разам з калегамі вузкія месцы. Важна выпрацаваць разам аптымальную парадыгму далейшага развіцця навукі, каб вырашыць шэраг вузлавых праблем. У ліку асноўных пытанняў — старэнне навуковых кадраў, неабходнасць узмацнення ўзаемадзеяння навуковых школ НАН і ўніверсітэцкіх навуковых школ. У свой час у Савецкім Саюзе было нармальнай практыкай, калі кіраўнік той ці іншай навуковай школы працаваў у Акадэміі навук і разам з тым быў загадчыкам кафедры або лабараторыі, якую сам заснаваў. Вельмі важна арганізаваць узаемадзеянне ўсіх галін ведаў. Сярод найважнейшых, фундаментальных задач — паскоранае навуковае развіццё, тэхналагічная бяспека. Трэба думаць, як будзем развіваць нашу навуку. У нас моцныя традыцыі. Хацелася б, каб усё тое, што дасталося нам ад нашых папярэднікаў у навуковай сферы, развівалася і давала адказ на найважнейшыя выклікі. Поспех краіны немагчымы без навукі», — падкрэсліў ён.
Намеснік старшыні Пастаяннай камісіі па адукацыі, культуры і навуцы Палаты прадстаўнікоў Вячаслаў Даніловіч нагадаў, што на разглядзе ў Палаце прадстаўнікоў знаходзіцца законапраект «Аб змяненні законаў па пытаннях прававой аховы аб’ектаў інтэлектуальнай уласнасці», які закранае ў тым ліку навуковую сферу. «Вельмі важна выканаць баланс інтарэсаў асабістых, грамадскіх і дзяржаўных, каб вынаходкі, новыя напрацоўкі як мага хутчэй увасабляліся ў жыццё і ўжываліся на практыцы. Заканадаўства аб інтэлектуальнай уласнасці не павінна перашкаджаць развіццю тэхналагічнага суверэнітэту краіны, не павінна ствараць лішніх перашкод», — зрабіў акцэнт ён.
«Кіраўнік дзяржавы ўдзяляе вялікую ўвагу развіццю навуковай сферы. Перад навуковай супольнасцю ставіцца мноства задач. Тут вельмі важны заканадаўчы складнік, каб не было перашкод для развіцця навуковай сферы, але разам з тым навуковае развіццё прыносіла максімальна магчымую карысць для нашага грамадства і дзяржавы», — сказаў на заканчэнне Вячаслаў Даніловіч.
