Праверка боегатоўнасці 7-й асобнай спецыяльнай міліцэйскай брыгады ўнутраных войскаў, якая праходзіла па даручэнні кіраўніка дзяржавы, завяршылася. Пра гэта карэспандэнту «Звязды» паведамілі ў прэс-службе Міністэрства ўнутраных спраў.
«Гатовыя да любога развіцця сітуацыі»
У прысутнасці прадстаўнікоў Дзяржаўнага сакратарыята Савета Бяспекі ваеннаслужачыя штодня на працягу двух тыдняў дэманстравалі свае навыкі баявой падрыхтоўкі, адпрацоўвалі розныя ўступныя, правялі працу з адмабілізаваным асабістым складам.
Акрамя таго, байцы паказалі свой узровень валодання прыёмамі рукапашнага бою, а таксама агнявой і фізічнай падрыхтоўкі. За праверкай на адным з этапаў асабіста назіралі дзяржсакратар Савета Бяспекі Аляксандр Вальфовіч і міністр унутраных спраў Іван Кубракоў.
«У Міністэрстве ўнутраных спраў гатовыя да любога развіцця сітуацыі. У ведамстве дастаткова сіл і сродкаў для процідзеяння выклікам і пагрозам, забеспячэння бяспекі ў краіне!» — адзначаецца ў афіцыйным паведамленні міліцэйскага ведамства.
Данііл ХМЯЛЬНІЦКІ
Фота МУС
